FURLANS DIGJITAIT FURLAN. Kappa Vu e vierç une vetrine web pai ebook in lenghe furlane

E je in linie une novitât di bande de cjase editore KAPPA VU di Udin, che e à viert un servizi sul so sît internet batiantlu FurlanInRêt. Di ce si tratial? Al è une sperance: chê di vê une pagjine dulà che i autôrs e i letôrs a podedin cjamâ e discjamâ oparis par furlan in formât di ebook. Dut chest nol è stât pensât par fâi vuere a la “cjarte”, come che si pues lei sul sît, dut câs al à chê di rivâ a vê un spazi che, in graciis des pussibilitâts de rêt, al permeti une plui grande partecipazion tant dai scritôrs che dai letôrs in lenghe furlane. Al è impuartant di dîsi che dut ce che al passe su cheste pagjine, in dutis e dôs lis direzions, al ven fat sore nuie.
Par cumò si cjatin ancjemò pocjis oparis, ma se la idee e menarà al sarà come jentrâ intune biblioteche siore dai materiâi che privâts, associazions, ents publics e scuelis a decidaran di meti a disposizion di ducj, lant a meti dongje une sorte di rêt culturâl.
Cuai saressino i risultâts? Un autôr gnûf al varès la ocasion di fâsi cognossi al public, o une des tantis oparis interessantis ma che no podaressin vê fortune sul marcjât, in graciis di FurlanInRêt e varès la ocasion di circolâ. Ancje une cjase editore che e à esaurît une sô publicazion in furlan e no à intenzion di tornâ a stampâle e podarès disfrutâ la idee de KAPPA VU par no fâ murî il libri. Se si pense a dutis chês ricercjis piçulis e grandis su la storie o su cualchi personaç locâl che a vegnin metudis adun ogni an di bande dai zovins tes scuelis dal oblic, si sa che, magari cussì no, finît l’an a riscjin di sparî tai armârs e da râr a son cognossudis fûr dal paîs. Decidint di cjamâ il lavôr su FurlanInRêt in formât PDF, la vore de plui piçule scuele furlane e sarès daurman a disposizion di dut il mont. Vin di visâsi che il prin ebook par furlan lu vevin fat a Manzan, vie pe Istât passade, propite i scuelârs, duncje la rivoluzion dal libri eletronic e je za chenti e no si pues fâ fente di nuie.
O vin viert disint che FurlanInRêt e rapresente une sperance, chest parcè che a ’nd è za servizis dulà che si puedin cjatâ ebook sore nuie (pensìn a Amazon, a iTunes e a Google Play). Fin in dì di vuê dutis chestis multinazionâls no àn vût interès tes lenghis piçulis stant che a puartin pôcs bêçs. La piçule KAPPA VU tal piçul Friûl, si pues dî in vêr stîl internetâr, e à capît che la rêt e je nassude par mandâ ator lis informazions cence barieris.
✒ Michele Calligaris