EDITORIÂL – Friûl dineât te urne nissun doman pe nestre tiere

✽✽ Dome une robe mi somee sigure, in chest moment di grande confusion politiche: in cualsisedi mût che a ledin chestis elezions regjonâls, pal Friûl nol sarà nuie di bon.
No dome parcè no je nissune liste furlane in corse, ma parcè che dal Friûl e dal so doman no si cjacare propit.
✽✽ Cheste e je le veretât: tai programs dai partîts la cuistion furlane no à dirit di rapresentance. Dome te liste di Bandelli al salte fûr alc, ma di consecuence dal progjet di Triest citât metropolitane.
✽✽ De mancjance di une liste autonomiste si podarès scrivi un romanç, dulà che si à di regjistrâ ancjemò une volte il grant intart de rapresentance politiche dai furlaniscj.
No je lade drete cu la ufierte dal simbul dal Moviment Friûl: cheste idee no passe. Amen. E viodût che no je la prime volte, si à di pensâi parsore e di capî il parcè.
✽✽ No je lade drete nancje cu la idee di meti dongje i Comitâts che in chescj agns si son metût adun par difindi il teritori furlan. La lôr pôre di pierdi consens su lis cuistions specifichis ju frene tal cjapâ posizion su la autonomie dal Friûl. Metìn dongje la trapule de racuelte des firmis e il cuadri al è sierât.
✽✽ Di sigûr, al è cualchi furlanist tes listis di diestre e di çampe. Auguris a chei di Friûl diferent che a àn decidût di stâi dongje ae Serracchiani. Di sigûr aes elezions pe Provincie di Udin e je significative le presince dai fradis dal Front Furlan che a domandin un vôt clâr in non de indipendence. E je ancje la liste dal Moviment Autonomist Furlan che e poie Fontanini.
✽✽ Ma al è dut chi, e al è masse pôc.
E noaltris no sarìn chei dal “tant piês, tant miôr”. No crôt che tal dna dai furlans e sedi une ideologjie dal gjenar, e se cualchidun le pense cussì al fale une vore.
✽✽ O pensìn invezit che lis sieltis de politiche taliane e dai siei partîts a ledin frontadis cun sapience e razionalitât, ma ancje cun coraç.
Disìnle dute. Chestis elezions a son la dimostrazion clare che e je colade dal dut la tele che e cuvierzeve la mari di dutis lis bausiis: la pussibilitât di convivence tra Friûl e Triest.
Il malintindiment di fonde – ven a stâi che al jere pussibil, par dôs realtâts diviersis par storie, culture, economie, svilupâsi dutun – nol ten plui.
✽✽ I programs eletorâi di Tondo, Serracchiani e ancje dai grilins no previodin un disvilup dal Friûl ma dome, e a peraulis, chel di une Regjon dominade e a misure di Triest.
✽✽ Un suicidi pal Friûl, ma ancje par dute la Regjon.
Al scriveve pre Bepo Marchet: “Se il destin dal Friûl al à di restâ leât a chel di Triest, o sin dal gjat”.
E someave dome une butade, cualchidun al pensave che une compromission e fos pussibile. No je vere, e di chest la societât furlane e à di cjapâ cussience, soredut dopo lis elezions.
Dree Valcic