Sfuei Mensîl Furlan Indipendent
Archivi de Patrie

Bentornâts a cjase, Flk

Gianmatteo Pellizzari

Prime delicâts artesans dal slis, po dirompents vuerîrs dal combat folk, po dopo inmò, sofisticâts neologjiscj de essence word. Mai compagns. Mai in rie. Mai trendy. E simpri malcuiets. Culturalmentri, politichementri, artistichementri. Cussì fuarts, cussì unics, di no vê contribuît ae memorabil “primevere furlane” vie pal deceni passât, ma di vêle caraterizade. Sì, caraterizade. Plui di ogni cenacul inteletuâl, plui di ogni lobby antagoniste, fûr di trop plui di ducj. Radical chic o barricadero che al fos. Chescj a son stâts, e a son i Flk. Chescj a son stâts, e a son, la imense Cristina Mauro, Stefano Montello, Loris Luise e Flavio Zanier (fermantsi al grup storic).
Chescj a son stâts, e a son, testemoneance dure come piere di une vitorie dople: sul circuit regjonâl, li che la peraule “identitât” e semeave in zenoglon denant de peraule “folclôr”, e sul circuit talian, li che i bielons «Re Noir» e «Sun» a àn stât a flanc a flanc de oligarchie etno-pop (Almamegretta, Agricantus, Sud Sound System) tal catalic de CNI. Une marcje trionfâl che, si à di dîlu, no je mai rivade a ruvinâ la inespugnabil autoronie dai Flk, masse timits par sintîsi impuartants e masse concrets par fidâsi dal marketing (lu conferme ancje la resinte, e duncje tardive jessude su internet: www.myspace.com/mitiliflk).
Dopo di une pagjine straordenarie come «Sun», publicade tal 2000, la spiete e jere pardabon fuarte. Une vore fuarte. E no dome dentri dal perimetri musicâl furlan. Ce forme varaie, si domandavisi, la prossime creazion? Cuale saraie la traietorie, tematiche e stilistiche, dal prossin viaç?
Ma soredut: saraial un prossin viaç? E velu chi, finalmentri, «Dancing Calipso»: il cuint (bielon) cjapitul di une discografie che e à simpri sielt di metisi in zûc, in discussion, afinant o tornant a dissegnâ i lôr orizonts sonôrs e culturâi. La solide inciertece dai ponts di passaç, cussì siore di pussibilitâts di sfueiâ, cuintri la fragjil ciertece dai ponts di rivade…
Une vore spietât, pardabon une vore spietât, chest tornâ, massime di cui che al adore i Fab 4 di cuant che si clamavin Mitili Flk e sot che alcronim a lassavin bati un crei «Furlan Liberation Kongress». Bentornâts a cjase, duncje, dopo siet agns di preocupant cidin discografic («O vin stât cidins parcè che no vevin nuie ce dî»).
Bentornâts cuntune opare, un lûc, li che i tescj sflandorôs di Stefano a incuintrin lis maraveosis olmis melodichis di Cristina regalant piçui grancj svoi tal cîl viert (l’incjant di «Se il nero» ti gjave il flât). Bentornâts cu la benedizion poetiche di Pierluigi Cappello e cuntun svolte, cence dubis epocâl, che dome ai khomeiniscj de marilenghe e podarà semeâ scandalose («Cjantâ ancje par talian – al sclarìs Stefano – dopo vê esplorât dutis lis pussibilitâts sonoris e evocativis de lenghe furlane nol à di vê la parvence di un sbandonâ. Anzit: al è propit il contrari»). Bentornâts a cjase, Flk…

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +