VIERTIDURE. Lis diocesis di Gurize e Pordenon a son restadis fredis

I setemanâi des diocesis di Gurize e Pordenon, par mieç dai lôr diretôrs, no àn dât man fuarte ae propueste dal setemanâl de diocesi di Udin in cont de riforme des Provinciis. Si ben che il diretôr, Roberto Pensa, al vedi dit a clâr che no si tratarès di un “Grant Friûl” di une bande e di Triest di chê altre, ma di un “Provincie dal Friûl” policentriche cun magari Aquilee tant che cjâflûc, la reazion dai vicins di cjase e je stade, in struc, un “no graziis”.
«Nô in Consei regjonâl o vin spiegât che la Provincie di Gurize e à di mantignî la sô identitât», al à dit il diretôr di “Voce Isontina”, Mauro Ungaro. «La nestre diocesi – al à zontât – e insist suntun teritori dividût par trê, tra lis Provinciis di Triest, Gurize e Udin. Chê de Vite Catoliche nus pâr une propueste inmagant, ma par nô in chest moment al è un resonament dal dut ireâl».
Pordenon, invezit, e cjale al Venit. La linie dal diretôr dal “Il Popolo”, pre Bruno Cescon, e je chê di une Provincie slargjade de Livence al Tiliment, in linie cui confins che e à cumò la diocesi di Concuardie-Pordenon. Un progjet, che al à ancje la sagume di un sium, ma che al à la poie dal vescul di chê diocesi. ■
A.L.