CULTURE – LA FABRICHE DAI… LIBRIS. Franc Fari, Il cjâf dai furlans

«Ancje i fruts piçui a san che alc di bon si pues imparâ di ducj. Tra cheste veretât e la mitizazion di cualchi popul, che e je stade fate inte culture ocidentâl, come par esempli i grêcs, i judeus, i romans, i todescs, e v.i. al è un biel salt. Plui di cualchi volte il mût di pensâ dai oms al è falât. Une des falopis plui grandis e je chê di scugnî vê dai superoms, dai erois. Cuant che no ‘nd è, alore si scuen inventâju. Al è un mût di pensâ che al nas intai fruts che, di pitinins, a viodin il pari e la mari tant che doi dius. Lis religjons, lis nazions e cumò la publicitât a àn savût doprâ une vore ben cheste bisugne di erois de int».
Cussì al scomence il saç numar sîs dal volum di Franc Fari Il cjâf dai furlans, editât une prime volte intal 2000 e tornât a burî fûr intal 2005, cu la zonte di doi gnûfs saçs (editôr Kappa Vu). Il titul di chest saç al è Sino noaltris furlans la miôr int dal mont? E il sot-titul dal prin paragraf al rispuint a la domande: «Braure furlane? Sì, ma dome par nô e cidine!»
Mi pâr che a sedin vonde chescj riferiments par vê une idee dal spessôr sientific di chest libri. «Al sarès un libri fondamentâl in cualsisei lenghe che al fos scrit (parfin par talian)». Cussì si lei inte prefazion di Sergio Cecotti. A son cutuardis saçs, plui une jentrade e une interviste. Il teme che al fâs di fîl condutôr al è costituît di une sience zovine, di avanguardie, la neurolinguistiche, che e à par assum di spiegâ il compuartament culturâl dai popui e lis diferencis jenfri lis culturis e lis lenghis. E chest su la fonde di studis sistematics di biologjie e di neurologjie.
Peraulonis? Lengaç masse specific, che al intimidis il letôr? Propit no! Anzi: il lengaç al è une vore semplic, a la puartade di dutis lis inteligencis. L’autôr al à vût dit che il nivel medi che al veve in ment lui pal so letôr al jere chel di une classe seconde mezane. Tredis agns! E cun di fat il libri si lu lei cence nissun fastidi, cence nissune fature, cuasi dusinte pagjinis che a corin vie lizeris. E plui di une volte, leint, al ven di pensâ che sì, chê robe li ancje jo le vevi pensade cualchi volte e chê altre robe li…e je propi cussì, ce maniere aio fat a no pensâi prime?
Baste lei cualchi titul dai cjapitui:
-Parcè i popui fevelino plui lenghis e no une sole? E subit ducj o pensìn al episodi de tor di Babêl intal libri de Gjenesi.
-Cemût tirâ sù fruts che a fevelin ben tantis lenghis? E i furlans a àn za biel pront un teren bilengâl, cence nissune spese… e pensâ che par tant timp lu àn butât vie!
-Cais e foncs tai rituâi religjôs dai prins cristians di Aquilee. E vele la nestre storie che e ven fûr, cui mosaics de basiliche mari, une ricjece che no cognossarìn mai vonde.
E fermìnsi culì.
Laurin Zuan Nardin