CULTURE – LA FABRICHE DAI… LIBRIS. Luchini e la pôre

Al è vignût fûr pe cjase editore Forum il romanç di Alberto Luchini Coventave vê pora?, libri che al à vinçût la edizion 2009 dal premi Sant Simon di Codroip. L’autôr, come tai altris libris che al à scrit, al dopre cun braure il so biel furlan di là da la aghe di Dograve di Sant Zorç de Richinvelde.
LA DOMANDE DAL PROTAGONIST_La storie e zire atôr a di un pinel cjatât dai doi protagoniscj, om e femine, fûr di un supermarcjât e che la femine si imponte tal volê puartâ a cjase.
»E se a lassâlu al fos stât Unabomber?» e je la domande che al fâs l’om, plui par dispiet che par altri. Chê che nas come une batude e tache però a lavorâ come un carûl tal cjâf de cubie. Il dubi planc a planc al devente pôre e po ossession che e rive a jemplâ ogni fressure intai pensîrs dai protagoniscj.
ATMOFERIS CECHOVIANIS_Lis tematichis e la atmosfere a ricuardin alc des contis russis dal votcent, al ven iniment par esempli Cechov, ca vie il sfont no je dut câs la sotane borghesie zariste ma la societât furlane di vuê. Un mont fat di capanons e di lavôr (bielis lis descrizions dai coleghis di ufici), dulà che il timp libar al è dome un vueit di jemplâ comprant robe intai centris comerciâi o cjalant la television intant che i siums si sfantin e la vite e smamìs.
Al è un mont pront a nudrîsi di pôre. La metafore e je fuarte e e rive ben a contâ la atmosfere di chêi che a son i agns dal dopo 11 di Setembar.
LIS POLEMICHIS DI CODROIP_Il libri al è chel che al veve vinçût il San Simon tal an des polemichis. Dopo vêlu let al ven di notâ come che lis critichis, almancul par chel lu inten, no fossin justis. Luchini al à scrit une storie cuntun respîr universâl che e rive a fâ rifleti sul mont di vuê.  Dal pont di viste stilistic lis sieltis a son interessantis e a puartin indevant la conte cun ecuilibri tant che il letôr al reste tacât a lis pagjinis par savê ce fin che al fasarà il pinel.
UN CONSEI_Si reste ancje tal notâ che il premi nol jere stât dât ae unanimitât, ma, almancul par chest pont, o sin ancjemò te legjitimitât des labirintichis sieltis di une jurie.
Ae fin il consei al è di dismenteasi di dut chest e lei il libri pal gust di leilu; lei cence vê pôre.
Maurizio Biasizzo