ATUALITÂT – Une gnove «Orchestre» furlane

E rive in musiche la miôr rispueste par chei che a disin che Pordenon nol sarès furlan.
L’Orchestra Cortile, formade di cuatri zovins cu la voie di sperimentâ formulis musicâls e linguistichis gnovis, a ‘nt son l’esempli.
MUSICHE PAR VIAZÂ_ A lei e scoltâ i lôr tescj si jentre subit cu la fantasie in chescj puescj, al somee di cori dilunc de strade, cjalant di fûr dal veri de machine e viodi il «Silina» o «chista ciera di lenc e sera», dulà che il furlan al esist, e inmò fuart, dome cuntune altre musicalitât rispiet a chel «standardizât».
E se di musicalitât si fevele, il lôr ultin lavôr «Ondis di glerie» (2010) al sa a puartâ il scoltadôr intune dimension gnove, intun viaç, come che al spieghe Paolo Paron, la vôs dal grup, parcè che chest CD «al è un omaç al nestri Friûl, al nestri paisaç, ai viaçs che a partissin di chi e achì a tornin».
La lôr storie e scomence tal 2006 cuntun progjet cantautorâl influençât dai grancj autôrs talians dai agns ’70 ma lassantsi viertis cetantis puartis viers la improvisazion jazz. Simpri cun lavôrs par talian si esibissin in diviers puescj dal nord Italie, sperimentantsi ancje cul teatri, cine e documentaris. Tal 2008 al jentre tal grup il sax tenôr Andrea Manfrin, che al da une vene jazz ae Orchestre.
IL PREMI FRIÛL_ Tal 2009 a cjapin il Premi Friûl come miôr gnove propueste musicâl in lenghe furlane; «Mi è simpri plasude le sene musicâl furlane», al spieghe Paron, «cognossude ai timps di «Tor a Tor» e «SicreticheSinteticheSinaptiche» di Straulino. La idee di proponisi pal Premi Friûl mi è vignude dopo vê scoltât la Bande Tzingare al Deposito Giordani (progjet Snait); il toc che o vin puartât, «Danze», al è saltât fûr tal zîr di dôs setemanis, al à passât la selezion e nus à fat vinci il Premi».
In dì di vuê il grup al è formât di Paolo Paron (piano e vôs), Andrea Manfrin (sax tenôr), Giacomo Franzon (liron) e Paul Mazzega (batarie e percussions). I lôr prins lavôrs a son «Muti di spalle» (2007) e «Life Music 28 marzo 2009» (2010).
Venusia Dominici