AI 32 DI MAI. Il poete cenzût di urtiçons

Se la Italie e je une tiere di sants, erois, poetis e navigadôrs, il Friûl al fâs dal sigûr ecezion. Ancje se o vin il mâr, noaltris o sin plui int di tiere, e la poesie no si pues dî che e sedi propit tal nestri DNA. Che il Friûl al vedi vût, e che al vedi ancjemò, i siei scritôrs, nol è un misteri, ma in fonts ancje in Svuizare al vîf cualchi ritardatari, tai Stâts Unîts al è cualchi magri, e fintremai a Triest tu cjatis cualchi lavoradôr.
Il furlan al è pratic, al cjale al struc, al dopre lis rimis dome par ricuardâsi alc di impuartant: cualchi regule par vivi cun plui savietât (Ogni mês si fâs la lune e ogni dì si impare une), par previodi il timp e par savê cemût organizâsi (A Sant Antoni, il frêt al va in demoni), o par mantignî l’ordin sociâl (Tal gjalinâr e je pâs se al cjante il gjal e la gjaline e tâs). Plui in là di li, fâ leterature al robe timp al lavôr.
Ma rivaiso a imagjinâ ce che al sarès sucedût se Dante Alighieri al fos stât furlan? Rivaiso a imagjinâ ce che e sarès deventade la Divine Comedie? Divine par mût di dî: cu la modestie dai furlans, si sarès clamade Comedie Cussì Culà, o al plui Comedie Avonde Buine.
E cussì, mi imagjini Dante che si piert intun bosc vie pe Cjargne e al cjate Jacum dai Zeis che, passât il Tiliment, lu compagne tal mont par là di là. E li al scomençarès il viaç jù tal infier, par discuvierzi pecjâts e pecjadôrs. Il prin ziron? Chel dai furlans che no tegnin pal Udin: chei altris blanc e neris che no sin noaltris, i interiscj e i milaniscj (che tant a stâ dongje dal diau a son usâts). Ducj costrets a berghelâ «schiribicilu» e a fevelâ dai timps di Jancker pe leç dal contrapàs (Dante, di bon furlan, al cjatarès un tic masse crudêl la pene di visâsi de esistence di Jancker).
Di li in jù, a vignaressin ducj i zirons di chei che no àn voie di lavorâ, metûts in ordin di fleme, scomençant dal ziron de sflacje par rivâ al ziron de voie di fâ nuie, passant li di chei che «voie di lavorâ saltimi intor» (chei altris pecjâts no coventin: la uniche vere colpe par un furlan e je chê li). Insom insom, plui in jù di ducj chei altris, Dante al cjatarès il ziron dai triestins.
No, se Dante al fos stât furlan, nol sarès deventât il pari de lenghe italiane, parcè che une volte rivât li, la Comedie Cussì Culà e sarès finide, cence chês altris cantichis.
A la fin da lis fins, cuant che un furlan si cjate devant un triestin obleât a sfadiâ tal infier, al à bielzà cjatât il so Paradîs.
BETE DI SPERE