Tal cuadri gjenerâl di cressite dai partîts indipendentiscj sarts, un risultât di particolâr interès lu à otignût iRS che al propon un indipedentisim gnûf e di roture, sedi tai presuposcj teorics che tes azions pratichis e fintremai tai simbui. Par savênt di plui, o vin sintût il semiolic Franciscu Sedda, un dai fondadôrs e ancje ideolic dal moviment.
Cuant e parcè nassial iRS?
Aumentâ lis pussibilitâts di identificazion indipendentiste. Dâ une scossade a un panorame indipendentist cun masse ambiguitâts, contradizions, inciertecis. Sfidâ l’indipendentisim, sfidâ nô stes, prime ancjemò di chei altris, a sei miôr. Chest al è chel che o vin fat cuant che tal 1998 o vin creât «Su Cuncordu pro s’Indipendentzia de sa Sardigna», che al è stât il lûc di ideazion e di incubazion di iRS, e po tal 2003 cu la fondazion di iRS. I risultâts o crôt che a sedin sot i voi di ducj. E no dome pe centralitât che iRS al à cjapât tal dibatit politic sart o pal 4% dai consens e l’inlidrisament teritoriâl simpri plui profont e slargjât. Lis inovazions di iRS in materie di elaborazion, di lengaç e di azion politiche a àn fat ben a ducj, ancje a cui che a so timp al à dit che nol coventave un gnûf sogjet indipendentist, parcè che a àn obleât la societât sarde a ripensâ se stesse fin te lidrîs.
Nus puedistu spiegâ i principis politics di iRS, vâl a dî chel che o intindês par no violence, no nazionalisim e no sardisim?
La no violence no je dome il refudâ di doprâ la lote armade par otignî risultâts politics. Te nestre elaborazion e devente un principi plui profont che al pues jessi tradusût cu la idee di jessi «propositîfs», vâl a dî jessi simpri «par alc» e no «cuintri cualchidun», che al è il miôr antidoti cuintri lis injustiziis. «Invezit di maladî il scûr, impie une cjandele», al diseve un savi orientâl.
Il no sardisim al è il nestri tirâsi fûr dal discors dominant de politiche sarde che al nas sul tacâ dal ‘900 e che si concretize te Autonomie Regjonâl che vuê o cognossìn. Al è un discors che si fonde su la idee che la Sardegne e sedi une «nazion abortive» o «falide» e che duncje il so destin nol puedi che cumplîsi dentri di une altre culture, di une altre nazion, di un altri Stât. E je une posizion suicide, che e cope volontariementri la diviersitât nazionâl dai sarts, e che e vierç la strade al rivendicazionisim economicist che al à segnât la storie dal ultin secul in Sardegne. La idee che il Stât nus veve di salvâ de nestre (supueste) «aretratece» e «barbaritât». Nô o disìn dome che no sin fîs di chê tradizion e che tacant di chê stesse tradizion no si pues fâ sù ni un indipendentisim minimementri coerent ni une societât sarde libare di complès vitimistics o di inferioritât.
Disconeti la idee di indipendentisim di chê di nazionalisim al vûl dî disconeti la prassi indipendentiste dal stîl violent, agressîf, rabiôs, ombrît, e des maniis dal orgoi narcisist che al puarte simpri a justificâ se stes, a copâ il spirt critic, il gust pes sfumaduris. La veretât e je che nô o sin pe nazion sarde ma no vin bisugne dal nazionalisim par realizâle. Noaltris o volìn un progjet nazionâl pe nestre Republiche, un progjet viert, inclusîf, plurâl, bon di tradusi la tradizion e la alteritât, un progjet che nol vivi di fetiçs o di nostalgjie e che nol vedi pôre de diviersitât, de alteritât, de inovazion. Nô no podìn vê pôre dal diviers, parcè che nô o sin diviersitât. Nô no podìn vê pôre dal gnûf, parcè che nô o vin voie di realizâ alc che nol è inmò. Noaltris o volìn tornâ a tiessi lis tramis de nestre storie, dal nestri percors di nazion, e fâ in mût che ognidun vuê al puedi identificâsi in forme positive e creative in cheste storie in divignî. Ognidun al pues deventâ sart amant la nazion sarde, impegnantsi cun jê e par jê.
Parcè proponêso di cambiâ la bandiere dai cuatri môrs cun chê dal Judicât di Arborea?
Al bastarès sclarî i tiermins par rindisi cont dal valôr de nestre sielte. L’arbul vert in cjamp blanc (che in nissun test de Ete di Mieç al è clamât «dislidrisât») e je sul imprin la bandiere dal Judicât di Arborea, vâl a dî un dai cuatri reams indipendents che a formin la Sardegne sul tacâ dal Mil. Ma cul lâ indenant de lote simpri plui unitarie e vincente dai sarts cuintri i catalans-aragonês e devente la bandiere de «republica sardisca», come che si diseve par sart, de «naciò sardesca», par catalan. E je a cheste storie indipendentiste, in chest moment clâr di unitât dai sarts, che noaltris o volìn colegâsi sielzint l’arbul vert. La bandiere dai cuatri môrs, che i sin ducj afezionâts, cjalant cun atenzion no à mai adempiût a chest compit. Fintremai dal so rivâ in Sardegne, tant che simbul aragonês, e à simpri rapresentât une Sardegne fedêl a une sovranitât esterne. Vuê duncje no si trate di odeâ i cuatri môrs, come che al pense cualchidun: si trate di cjatâ un altri amôr, plui nestri, un amôr pardabon indipendentist.
La vuestre classe dirigjente e à une etât medie tor dai 30 agns e ancje l’eletorât al à une etât medie cetant basse: cemût rivaiso a svicinâ tancj zovins al vuestri moviment?
In Svezie, i leaders politics a àn fra i 30 e i 40 agns. In Italie a son fra i 60 e i 80. Forsit noaltris no sin un moviment zovin, o sin dome un partît seri, normalmentri european, bon di tirâ dongje personis di ogni fasse di etât cuntun lengaç gnûf, cuntune atenzion ai problemis di ducj, cuntune passion sincere pal impegn public. Jo o crôt che iRS al fasi prese dapardut li che al è dinamisim e voie di metisi in zûc in maniere responsabile par dâ un contribût, ancje piçul, ae Sardegne e al mont. I sarts di vincj e di trente agns di vuê a àn cheste grande cariche e a vuelin jessi protagoniscj dal lôr presint.
Voaltris o dais un grant risalt ae ricostruzion de identitât sarde, ma ce spazi àno te vuestre elaborazion la culture tradizionâl e la lenghe sarde?
La cussience storiche, la lenghe, il patrimoni nazionâl, lis risorsis economichis, i dirits sociâi, l’ambient e tant altri: ogni element al è decisîf te costruzion de nestre nazion. Ancje par chest, nô o vin di defolclorizâ la tradizion e tornâi a dâ dignitât nazionâl, o vin di tradusile par fâle sintî patrimoni dal presint e no vanzum dal passât. E o vin di impostâ une serie politiche plurilinguistiche li che il sart, midiant di un standard, al deventi lenghe nazionâl e lis sôs tantis variantis a sedin patrimoni des nestris comunitâts. Cui saial di plui: cui che al fevele talian e inglês o cui che al fevele talian, inglês e sart? Nô o volìn zontâ vite: plui lenghis, plui ricjece culturâl, plui creativitât e cure di noaltris al vûl dî plui benstâ morâl, sociâl, economic. Al vûl dî creâ une Republiche plui biele.
Si movês tra elaborazion politiche e azions no violentis, tra teorie e prassi: vuelistu contâ cualis che a son stadis e cualis che a saran lis vuestris bataiis plui impuartantis?
A saressin pardabon un grum. De azion dal 2003 cuintri il cuel dai velens dal Enichem a Porto Torres, ae mobilitazion par tornâi a dâ dignitât a chel patrimoni archeologjic incredibil che a son i Giganti di Monti Prama, ae bataie pes jentradis che il Stât nol torne ai Sarts di 15 agns cu la propueste de Casse Sarde des Jentradis, ae celebrazion dal sîscentenari de Bataie di Sanluri dal 1409, aes denunciis cuintri l’eolic «sporc» e il dialic cui sienziâts sarts par une green economy tal interès de coletivitât. A ‘nd lassi indaûr une vore, comprendudis cualchidune di chês che a àn vude ancje plui evidence mediatiche. L’impuartant al è capî che daûr di ogni azion di iRS e je une elaborazion, e che la azion e je un passaç dentri di une narazion plui slargjade che no finìs cu la azion in se. La azion e je un strument par creâ, meti adun, proponi, no dome par desideri di proteste o di contestazion.
Parcè âstu titulât il to ultin libri ‘I Sardi sono capaci di amare’?
Il titul al è une sfide. Visâsi che o sin stâts bogns di amâ nô stes e la nestre nazion. Bandonâ stereotips plui o mancul reâi tant che la invidie, la vendicativitât, il rancûr e tornâsi a vierzi ae cooperazion, ae solidarietât, ae condivision di un progjet di cressite umane e democratiche. Parcè che, visìnsal, i popui no nassin unîts: un popul si unìs dome se lis personis a àn alc di positîf e di impuartant di realizâ insieme.
Cemût viodistu la Sardegne dal doman? Cuant saraie la Republiche Sarde indipendente?
La Sardegne dal doman le volarès cjalde e ospitâl, e esempli pal mont. Une Republiche politichementri libare, socialmentri juste, economichementri prospare, moralmentri degne.
Cuant saraie? La storie e cor svelte. E l’impegn di tantis feminis e oms de Sardegne, ogni dì plui consapevui, motivâts, apassionâts, le fâs acelerâ. La indipendence e je un pôc plui lontane di chel che o voressin (jo le volarès vuê!) e cetant plui dongje di chel che o imagjinìn.
Ivo Murgia
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +