ATUALITÂT – Letaris

Precisazion
O vin ricevude cheste precisazion (par talian, ndr) dal President dal Ordin dai Gjornaliscj dal F-VJ, Pieri Villotta intervistât sul numar di Setembar 2010.
O ringracii pe interviste e pal biel ritratut a lapis (compliments a Gianni Di Lena), ma cul riclam in prime pagjine no i sin. No dome no ai mai dit «Il Friûl e Triest? Miôr separâts», ma nancje no lu pensi. O pensi invezit, e chest al è ancje te interviste, che lis dôs conurbazions di Udin e Triest a podaressin costituî dôs areis metropolitanis difarentis te regjon, ma chest al è il contrari de separazion. La regjon Friûl-Vignesie Julie e je cence dubi «juliane» començant di Forum Julii, che plui «julian» di cussì no si pues; al stone in câs chel «Vignesie» che Graziadio Isaia Ascoli, inventôr di cheste denominazion, al voleve cjapâ dentri dute la zone adriatiche storichementri apartignude a Vignesie, vuê slovene e cravuate che nô no si insumiìn dal sigûr di rivendicâ. La Vignesie Julie e jere sûr de Vignesie Euganie e de Vignesie Tridentine. Vuê se tu vâs a Trent a fevelâ di Vignesie Tridentine ti fasin cori, se tu vâs a Vignesie a fevelâ di Vignesie Euganie no san nancje ce che e je.
E je restade, rivoc dal clime invelenât dal secont dopo vuere sul confin orientâl, dome la Vignesie Julie. E murarà cui ultins esui.
Ma un cont a son i nons des regjons e un cont e je la sostance. Cheste regjon no pues dividisi, pene la dissoluzion e la pierdite di ogni «specialitât».
Par chest no ai mai pensât a «separâ» Udin di Triest, in câs che a coltedin ognidune lis sôs specificitâts e lis sôs vocazions. Une regjon e baste e e vanze.
Mandi, Pieri.
AL RISPUINT DREE VENIER:
A coventaressin plui acuilis e mancul paveis
Cuant che nus è rivade in redazion cheste rispueste o vin tirât il flât: «ah bon, dut al è tornât normâl!». Pieri Villotta, di fat, nus jere someât un rivoluzionari che, biadelore libar di fevelâ, al diseve fuartis robis furlanistis e o jerin restâts. Dal sigûr, o vin stracapît noaltris e i domandìn scuse. Ma pensait che lu vin fat ducj, parfin il nestri diretôr che nol è di prin pêl. Al à di jessi stât parcè che te interviste Villotta al pant cun braùre di jessi un dai fondadôrs dal Moviment Friûl e subit dopo nus dîs che TS e Friûl a son dôs realtâts diviersis: nô alore o vin fat un plui un. Tal simbul dal MF, di fat, e je une biele cjartute dal Friûl, Friûl propit: cence Triest e cun Sapade e il Mandament di Puart zontâts.
Par chel che al rivuarde la separazion de Regjon e la specialitât, cu la riforme federâl – metìn par assurt che si fasile in maniere serie – al varès di cambiâ dut, ma se par prins cierts furlans a vuelin par fuarce stâ cun Triest o sin malmetûts.
Dree Venier
________________________________________________________________________
Su Friuli.doc e Gusti di frontiera
Cjarissim Diretôr,
o ai let il so editoriâl dal n. 9 de Patrie e mi cjati in plen acuardi cun Lui ma o volevi meti dongje ancje lis mês considerazions che a son:
Friuli doc e dopo Gusti di frontiera a son manifestazions enogastronomichis che no visiti plui parcè che no condivît. Parcè che mi soi cjatade sintade intai marcjepîts sporcs. Stesse identiche robe mi à sucedût a Gusti di Frontiera.
Ma chest an a Gusti di Frontiera o ai cjatât un articul sul Friuli te pagjine dal Isontino dulà che, e jere ore, a scomencin lis protestis di bande dai partecipants, un dai plui rapresentatîfs che al è il Centro tradizioni di Borgo San Rocco (scrit rigorosementri par talian ancje se al è il Borc storic plui furlan de citât e ricognossût come tâl di ducj e dulà che o soi a stâ) par bocje dal so president Paolo Martellani al scrîf: «Ormai l’evento è diventato una chiassosa fiera come tante altre, non valorizza più il territorio, ed i partecipanti arrivano un po’ da tutti i paesi. A questo punto la nostra presenza non è più qualificante».
Ancje la promozion sui media e je scjadinte e di bas livel, la Rai regjonâl-triestine e à nomenât Friuli.doc dopo Pordenonelegge che al somee che e vedi un sucès strepitôs, vino dome di promuovi il mangjâ e bevi? E i furlans che si interessin di culture pluitost che a implenâsi? Che cheste e sedi la solite politiche dai conseîrs regjonâi e locâi che nus passin par bevûts e amants dal folclôr?
Isa Dorigo, Sportel pe lenghe furlane de Provincie di Gurize
AL RISPUINT DREE VALCIC:
Preseade Isa Dorigo,
o pues condividi che i moments di agregazion no varessin di jessi dome di folclôr e mangjâ e bevi. Ma no si à di trai cuintri dut e ducj. Propit parcè che o condividìn la linie di partî dal bas, ancje chest an (il secont consecutîf) midiant de atenzion e sensibilitât de Provincie di Udin, o vin vude la pussibilitât di jessi presints a Friuli.doc par proponi la nestre riviste, adun cu lis publicazions di Glesie Furlane.
Acusâ i organizadôrs che cierts events a son dome «sporc e implenâsi» al è sul stes plan di cui che al acuse i furlans di jessi «bevûts e amants dal folclôr».
O preferìn dimostrâ cui fats che il Friûl al à un patrimoni che nol è dome enogastronomic (che dut câs o preseìn une vore) e par chest o continuìn mês par mês a fâ cognossi la nestre vore sul teritori, tal mieç de int.
Cu la sperance di podê dimostrâlu ancje a Gurize, o ringrazìin chi ducj chei che nus àn dât bon acet ta chescj mês par presentâ la nestre riviste.
Dree Valcic