LA INTERVISTE – La fuarte comunitât furlane dal Canadà

La Federazion dai Fogolârs dal Canadà e je stade creade tal 1974. Vuê 16 Fogolârs e Fameis a son federâts par fâ che intun paîs tant grant al sedi un coordenament di ativitâts furlanis e par promovi, incoragjâ e judâ iniziativis di caratar caritatevul, sociâl culturâl e ricreazionâl e che a coventin a svilupâ il bonvivi de comunitât furlane canadese. Compit de Federazion al è ancje svilupâ e mantignî strent il leam stret tra i ents federâts. La Federazion e je ancje un puint tra lis istituzions Furlanis dal Friûl e lis associazion di chenti.
Il mantignî e svilupâ la culture Furlane tal Canada a restin simpri tra lis finalitâts plui impuartantis de nestre organizazion.
I Fogolârs e Fameis che a costituissin la Federazion a son in Vancouver, Calgary, Edmonton, Winnipeg, Sault Ste. Marie, Sudbury, Windsor, London, Niagara, Oakville, Hamilton, Ottawa, Montreal, Toronto e Halifax.
Une o dôs voltis par an si riunissin i representants delegâts dai Fogolâs\Fameis, Societât Furlane, par discuti i lôr afârs e coordenâ lis ativitâts de Federazion e par cirî e cjatâ manieris di promovi la furlanitât in chest paîs. Al timp de fondazion de Federazion, tal 1974 e je stade organizade la Prime Cunvigne gjenerâl di furlans dal Canadà inte capitâl Federâl Ottawa.
Di chel an indevant, ogni doi agns, i Fogolârs a organizin une cunvigne intune citât canadese. Chê dal 2010 e sarà dai 3 ai 6 di Setembar a Windsor tal Ontario.
Chestis a son cunvignis culturâls di grande impuartance par vie che si discutin cuistions fondamentâls de nestre comunitât dal Canadà. Si fasin trê zornadis di studis su la nestre realtât furlane tal Canadà e di ativitâs culturâls e manifestazions furlanis.
I rapresentants, doi par ogni Fogolâr e Fameis a costituissin il comitât aministratîf di dute la Federazion. Si pues dome imagjinâ che par coordenâ dut chest lavôr a 3 o 4 mil chilometros di distance un dal altri, vuê si fas par email e par telefon.
Ivan Cargnello