ATUALITÂT. Ator pal mont des migrazions

Il prin fin di setemane di Otubar si è davuelte jenfri Udin, Remanzâs e Paulêt la cuarte edizion di Ator pal mont, la manifestazion internazionâl su lis migrazions. Un titul par furlan par une manifestazion internazionâl, a dimostrazion dal leam che al è cul Friûl. Di fat la sielte di dâi ae manifestazion chest titul e je nassude pensant al leam jenfri furlans e migrazion.
LA GNOVE EDIZION_ Daspò di vê fevelât de culture romanì tal 2005, dai moviments migratoris dai paîs dal Est Europe tal 2006 e dal rûl de femine tai moviments migratoris contemporanis tal 2007, chest an a son stâts l’ambient, il mangjâ, la aghe e i moviments migratoris i protagoniscj. Migrazions causadis dai mudaments ambientâi, la plui part des voltis tragjics e causâts dal om, che a oblein la int a cirî gnûfs spazis dulà vivi.
L’obietîf de manifestazion al è chel di frontâ l’argoment de migrazion in dute la sô complessitât: chest al è il valôr zontât de manifestazion. Par rivâi i organizadôrs a àn prontât un program pardabon siôr di iniziativis: cunvignis, taulis tarondis, spetacui teatrâi, cine e mostris.
LEAM CUL TERITORI_ Come pes edizions passadis, ancje chest an il leam cul teritori al è un vore fuart. Lûcs e apontaments difarents, dutis sieltis che a permetin di cjapâ dentri simpri plui int. No cambiin dome i lûcs de manifestazion, ma ancje i mieçs doprâts: de radio, dulà che a son ladis in onde taulis tarondis, a Internet, dulà che a saran publicâts i ats di cheste cuarte edizion, inricjîts ancje cun materiâl inedit. L’obietîf dai organizadôrs pal an che al ven al è che di cjapâ dentri ancje la television.
Ator pal mont no je une manifestazion dome par grancj: ancje chest an a son stadis organizadis iniziativis di pueste pai fruts des scuelis.
SPETACUL FINÂL_ Come ogni an, Ator pal mont si è sierât cuntun spetacul teatrâl in marilenghe: Dagos. Furlans pal marimont. Une serie di leturis compagnadis de musiche, une serade pardabon emozionante e une vore preseade dal public che al à jemplât l’auditorium di Remanzâs. Dagos al fevele dai aspiets mancul cognossûts de emigrazion furlane (e taliane): de dificoltât di integrazion, dai prejudizis e de discriminazion, ce che nô o vivevin agns indaûr e che e je la realtât di cumò par ducj chei che a cambin paîs. Furlans int in moviment, che tai agns si è spostade une vore e che cumò invezit e “ricêf” gnovis popolazions.
Federica Angeli