“O sin dal dut sigûrs che il Friûl al podarà ripiâsi dal so parziâl sotsvilup dal dì di vuê produsint i siei laureâts, animâts dal amôr pe Piçule Patrie tai lôr studis academics e tes lôr ricercjis sui problemis furlans”.
Josef (Joseph par inglês) Gentilli al scrivè chestis peraulis, publicadis tal Boletin uficiâl de Cjamare di Cumierç di Udin, tal mês di Novembar dal 1965, juste 43 agns indaûr. Peraulis gjavadis fûr di un so studi statistic su la situazion economiche dal Friûl di chê volte in rapuart ae necessitât di creâ un ateneu furlan par sigurâ un avignî ae nestre tiere. La ricercje e je vignude fûr di resint sul libri L’Università friulana di Joseph Gentilli 1965/66, publicât dal Istitût Ladin-Furlan Pre Checo Placerean (pe recension dal volumut viôt a pagj. 27).
Ce che al scrivè Gentilli al pant il so caratar di om lucit e sclet, il prin a domandâ di meti in pîts une universitât dute furlane “libare e indipendente” su la fonde di cifris e statistichis, evitant “a ducj i coscj cualsisei sorte di nepotisim politic o ben di cjampanilisim regjonâl, sedi tes fasis di progjet sedi in chês di metude in vore”. Secont lui lis facoltâts che a varessin vût plui sucès a saressin stadis chês di Agrarie, Economie, Medisine e Lenghis (par studiâ il furlan e lis sôs variantis, e in plui todesc e sloven). Une profezie te profezie!
Nassût a Sant Denêl ai 13 di Març dal 1912 te uniche famee ebraiche dal paîs, Josef, cemût che al conte te sô autobiografie (Orme sulla via. Pensieri e riflessioni sulla mia vita, Ribis 2001), al patì l’esili a Bologne par un an daspò dal disastri di Cjaurêt. Lât a stâ a Udin cu la famee tal 1923, al cjapà il diplome al Zanon. Laureât a Vignesie in Economie, tal 1934-35 al lavorà te Universitât di Florence tant che assistent dal gjeograf Renato Biasutti.
Tal Avost dal 1939, la decision di scjampâ de Italie fassiste che e veve adotât lis leçs raziâls par lâ in Australie: midiant il jutori de comunitât ebraiche di lenti jù, tal Març dal ‘40 Gentilli al jere bielzà professôr di Gjeografie te Universitât di Perth, li che al restà par dut il rest de sô vite. Al rivà a gjoldi di une buine innomine ancje tant che climatolic; al scrivè in dut une dozene di libris e centenârs di articui e saçs, cualchidun ancje sul clime e su la gjeografie dal Friûl. Di no contâ i tancj ricognossiments che al ve intal Continent Gnovissim, mintri che ca di nô a son in pôcs a cognossilu.
Josef Gentilli al murì a Perth ai 8 di Avost dal 2000: al veve 88 agns.

ALESSIO POTOCCO