I 100 agns di pre Checo, un profete che al cjalave lontan

Ricuardâ pre Checo, intal sens di memoreâlu, nol è gran facil: tantis a son lis diamantaduris de sô personalitât pal rûl che al à vût inte bataie dal autonomisim, in difese de identitât furlane e in gjenerâl dal pont di viste culturâl e religjôs.
◆ Visâsi, invezit, di chel “clergyman” simpri plen di schelfe, de puce di toscan che lu acompagnave, al devente cuasi naturâl e ricorint – no dome in ocasion di datis e cerimoniis – par chei che a àn vude la fortune di cognossilu tant che insegnant intes aulis dal Stellini.
O soi tra chei, di chei agns dal Liceu, e o sarès un bausâr se vuê o disès che za chê volte o capivi, jo come tancj altris, la stature inteletuâl di chel predi che nus “faseve” religjon.
◆ Simpri cun bocje di ridi, cuasi surian, e za chest al varès volût dî tantis robis di lui. O vin capît plui tart che chê cjalade ironiche, marcade dai ocjâi dispès in belance sul nâs, e mandave carisme, nus regalave une concezion dal mont, une Weltanschauung par dîle a todesc vie, robe che i sarès plasude, chê dal dubi e de curiositât  in ducj i cjamps: lis dôs cundizions essenziâls dal savê.
◆ Pre Placerean al cjalave lontan, ma par fâti cjalâ il futûr al voleve che tu saltàs intal passât. La sô ore di lezion si trasformave intun dialic rispietôs de “nestre ignorance”. Nol mostrave mai insoference pes nestris domandis, dispès provocatoriis in maniere stupide, viodûts i agns de contestazion studentescje che propit al Stellini e viveve la sô stagjon plui intense.
◆ Al sotscrit, tifôs fresc e malmadûr di Marx, i sclarive cualis che a fossin lis contradizions dal comunisim, lis sôs consecuencis dramatichis e la sô disfate inevitabile. Ma mai cun ruze, cun asse, cu la veretât di un dogme, che lui al jere so nemì braurôs in cualsisedi forme che si presentàs.
◆ E il Friûl? Nol faseve proselitisim in classe pes sôs ideis autonomistis. L’amôr pe sô tiere al steve intes citazions, intal fâ tornâ fûr la storie di Aquilee come se la cussience di cui che o fossin e di dulà che o vignissin e ves di nassi di un percors intim, personâl. Une scuvierte di fâ in plene autonomie.
Pre Checo al preparave lis cussiencis, al semenave ideis, ti vacinave cuintri de injustizie e de logjiche dai potents, ancje cence che tu inacuarzessis.
◆ Cuant che, a tu par tu, dongje de catidre i ai domandât ce che al pensàs dal ’68 che o jerin daûr a vivi, mi à rispuindût: “Dree, al finirà dut e svelt. O sês zovins e us stan doprant cemût che a àn fat simpri. Si stais dismenteant di cui che o sês fîs, o cjalais inaltrò e no viodês lis lidrîs, ma cence di chês no si va di nissune bande”.
◆ E dopo  mi à fat bocje di ridi, ma e jere une bocje di ridi un pôc avilide. No une condane, ma nancje une assoluzion. ❚
Dree Valcic