Chest an di pandemie, il Zîr di Italie in biciclete si davuelç in Otubar e par trê dîs al sarà su lis stradis dal Friûl, in gracie de organizazion di Enzo Cainero. Il miracul al è che chest an ancje la plui “taliane” des manifestazions e fevele par furlan, par merit di une biele iniziative che Dino Persello al à inmaneât cu la poie de Arlef e dal Istitût Ladin Furlan Pre Checo Placerean. Si fevele di un spetacul che si clame “Il ciclisim al è poesie”, che al tocjarà 11 localitâts dulà che e passarà la caravane dal Zîr, di Cjaneule a Ruvigne, di Nimis a Buie, di Tramonts a Basilian, di Lusevare a San Denêl, passant par Sedean e Udin. Cu la sô voie di contâ ricuarts, emozions e storiis di sport e di vite, Persello al menarà il public a torzeon tal timp e tal spazi, par scuvierzi la bielece di un sport che di simpri in Friûl al à une vore di praticants. E tal Zîr di chest an, di fat, al cor ancje Matteo Fabbro, zovin di Buie che al è ae sô prime partecipazion ae corse rose. Cuissà che nol vedi daurman cualchi biel sucès?❚

Redazion