Seste pontade. Autonomie come categorie spirituâl

A van indenant lis pontadis di un intervent di pre Antoni dulà che al presentave un dai aspiets di fonde des bataiis di pre Checo Placerean: la autonomie. Autonomie peade ae libertât, parcè che no pues jessi une cence di chê altre.
Pre Checo al à simpri mostrât un amôr profont, istintîf pal popul furlan. Si sintive come il pes te aghe. Di chi, lis sôs bataiis pal Friûl su ducj i fronts: civîl, religjôs, culturâl, politic… E no si è sparagnât tai siei impegns proponint manifestazions, partecipant a dibatits, a lezions, a comizis, dedicantsi a traduzions di tescj biblics e liturgjics, celebrant datis simbolichis tant che il 3 di Avrîl, la fieste dal patriarcjât cu la messe dai sants Ermacore e Fortunât, cirint in dutis lis manieris di creâ cussience tal popul, di trasfondi la stesse sô passion e il stes so amôr.
pre Roman Michelot
Inte assemblee dai predis dal 1975, la grande assemblee che jo le paragoni ai stâts gjenerâi francês dal 1789, a un ciert pont pre Checo al à dit, parafrasant Mao: “Il predi al pues fâ dal ben se al è cul popul come un pes te aghe. Se nol è cul popul, al vûl dî che al è cuntune altre aghe”. O crôt che in chel moment al jere autobiografic. Lui al barufave cul popul, ma nol podeve stâ cence. Parcè che chê e jere la sô aghe, il so mont, il so dut, intun rapuart conflituâl e dialetic ma reâl.
◆ E lui, om che al respirave libertât e autonomie, al à volût cheste autonomie e cheste libertât ancje pal so popul. In ducj i setôrs vitâi, dal moment che la vere storie di un popul e scomence dome cuant che al è libar. Cence libertât nol pues fâ storie, la sô storie, ma al pues dome acetâ la part di comparse, di famei, di sotan, di vitime di une storie che no je la sô.
◆ L’insegnament e la vore di pre Checo si son svilupâts in plui setôrs e moments ma cun chê unitarietât che o ai dit. Nol è facil, e nol è sigurementri chest il moment di fâ une analisi minude di dut il so operât e de peculiaritât e esemplaritât di chest operât che al à cjapât dentri un arc di 15 agns, dal 1964 al 1979-80, des manifestazions a Udin pe facoltât di medisine ai prins agns de ricostruzion, cuant che pre Checo al à frontade la part plui dolorose di une vite ni lungje ni facile. O ai cirût di butâ jù lis mês riflessions e i miei ricuarts inte biografie scrite sui dîs agns de muart e o vuei sperâ che la universitât di Udin, ma ancje la glesie furlane, e vedi il sintiment di studiâ cheste grande figure e chest timp privilegjât. O vin tra l’altri ancje cheste iniziative de borse di studi che, mi auguri, e vignarà doprade e ripetude tai agns e magari rimpolpade.
◆ Pre Checo al è partît de idee-mari di popul, il popul furlan. Un popul ben caraterizât e identificabil in ogni dimension. La sô precision lu puartave a cjatâ fûr ancje lis carateristichis somatichis, a partî de stature, che no faseve sfigurâ un furlan nancje intun pichet armât a vuardie di un ministeri di Berlin, al colôr dai cjavei, cuntune percentuâl fûr dal ordenari di cjavei ros. Cuant che inte assemblee dal 1975 pre Rinalt Vidon i à dit che nô o sin latins, lui i à berlât:”Tu, cun chê muse rosse, tu sês almancul gôt!”. ❚
pre Antoni Beline