Sfuei Mensîl Furlan Indipendent
Archivi de Patrie

Pierluigi Cappello, Amôrs, (cun dentri Il me donzel), Pasian di Prât 1999

Laurin Zuan Nardin

Cîr par lampâ lampâ pal cîl blancjìis / e torne achì, che piel plui piel lumere / un nassi al fâs e un cressi di lumere / dai tiei vôi in amôr. Fûr al è il frêt / il cjalt dentri inte’ pleis da la cuvierte / il clip la piel ch’o cor da la tô cuesse / sgrisul i dêts, sofli sul bosc adôr / da la tô fuesse, cîl Domine al è / il cîl daviert de tô cu la mê bocje / sbissule rosse flamisele ros / florisel te fumantere d’unvier / la tô lenghe ch’o vîf”.
◆ Cussì la prime des tredis poesiis di amôr dal poete di Scluse (1967-2017), che de vite al à vût sdrondenadis tremendis e che inte poesie al à savût cjatâ la sô vere dimension. Pierluigi al è stât poete di largje innomine, cognossût a nivel nazionâl e vincidôr di plusôrs premis. La sô produzion poetiche e je plui di dut par talian (cumò racuelte intal volum Un prato in pendìo. Tutte le poesie 1992-2017), ma al à scrit ancje par furlan: Amôrs, Il me donzel (un clâr evident riferiment al Pasolini des Poesie a Casarsa) e Inniò (dentri in Dittico, 2004), biele, preseose peraule furlane, un avierp in origjin, ma che il poete al volte intun sostantîf par dî “in nissun puest, il puest che nol è un puest”. E al fâs pensâ al Verso novunque, dal poete romanesc Mauro Marè (1935-1993). Poesie intense e luminose chê di Pierluigi, cualchi volte fuarte, cualchi volte cetant tenare, cualchi volte ermetiche, cuasi che al volès lassâi al letôr la facoltât e ancje il plasê di interpretâ lis atmoferis, lis metaforis, lis imagjins dai nûi, de nêf, de ploie, de lune, dai colôrs (il colôr dai colôrs), des monts, des stelis, dal cori dai mês. Cui isal chel frut che al va discolç viers inniò? Di cui sono chei pîts? Pierluigi nol à podût plui cjaminâ dai sedis agns insù, i siei pîts dulà podevino puartâlu se no dome inniò? E po, lis poesiis di un amôr che al brame di rivâ a une union cu la amade: e je dentri te tô la mê pôre; tu tu ti dâs e jo no ti sai; cjâf cun cjâf, cjavêl cun cjavêl. E chest TU al è indreçât a une JÊ che lui al clame Domine, cuntun riclam ae poesie des origjins romanzis: no si pues no pensâ ae nestre Bielo dumlo di valôr (dumlo al ven dal latin dominula). Pierluigi al nasave i libris; nol è un mût di dî: se tu i davis in man un libri gnûf, lu vierzeve e sal puartave devant dal nâs. Al è biel che un poete di cheste nivel al vedi scrit ancje par furlan. ❚

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +