Il mês di Jugn al scomence l’Istât. A sierin lis scuelis… ah, no, scusait.
Po ben, si tache a lâ al mâr! Ah, sì, o vês reson, lassìn pierdi, par cumò.
Ma intant che si studie un mût par meti jù i ombrelons a distance di sigurece, si consolìn cun dutis lis sagris dal mês! Cemût? No?
Cualchi gridelute cui amîs tal curtîl? Nancje chês?
Alore, fasìn cussì: chest an, il mês di Jugn al è rimandât al an cu ven.
Il sant dal mês
Il prin di Jugn, e sarès la dì di Sant Fortunât, ma dome par chest 2020 nus somee plui oportun rimplaçâlu cun Sant Al Podeve Lâ Miôr.
Personaçs nassûts in Jugn
Bepi Labrador, inventôr dal no lassâsi come cjans.
Vigji Vigjil (amì strent di Bepi Labrador), inventôr de “strade par daûr”.
Dì e gnot
Il soreli in Jugn al jeve in medie tor lis cinc e vincj, al sta ator ancje fin nûf di sere. E no i covente nancje la autocertificazion.
Il sport dal mês
La burescule. Par fâ contents i anzians e par rispietâ il distanziament sociâl, in Jugn si podarà organizâ torneus di burescule, une vie di mieç tra burelis e briscule.
Si zuie come a briscule, ma stant lontans almancul doi trê metris un di chel altri, duncje al tocje tirâ lis cjartis come une bale. Al fâs pont chel che al cjape sù lis cjartis de taule, ma ancje chel che al rive a tirâlis plui dongje dal mac
I proverbis dal mês
Ognun al bale cun sô sûr, parcè che la agne e je intun altri stât di famee, e tocje tignîle almancul a un metri di distance.
◆ Ogni biel bal al stufe. Massime cuant che no tu puedis fâlu cun tô agne.
I apontaments dal mês
Ai cuatri di Jugn, la zornade mondiâl des alergjiis. Par sostignî la ricercje sientifiche, o podarês comprâ in dutis lis placis une biele plante di graminaciis.
◆ Tor de metât dal mês, e je la zornade mondiâl de lote cuintri de strache. No mi visi di precîs in ce dì che le àn metude, e cumò no stoi a jevâ par controlâ. Tant, par festezâ no àn organizât nuie: masse fature.
◆ Ai cuatri di Jugn, e scomence la mostre dai lavoradôrs triestins. Cemût? No jerino sieradis, lis mostris? Sì, ma tant che chi e je vueide. ❚
Jugn, il mês de burescule
Bete di Spere
