Istituzions e leçs de Patrie a forin scanceladis e cumò no si cjate di lôr nissune olme nancje tai libris de Universitât
O vierç il manuâl di Storie dal Dirit. Chel in adozion te universitât di Triest: nancje une peraule. Alore o provi a viodi se mai in cualchi manuâl di Storie Medievâl, simpri di nivel universitari, alc si pant, un paragrafut, une note par rimarcâ une situazion istituzionâl tant uniche in Europe e intal Mont, vie pe Ete di Mieç. E ven fûr la “Magna Charta Libertatum”, siglade di Zuan Cence Tiere intal 1215. E si dîs che il document al sarès ecezionâl, parcè che pe prime volte il podê e la autoritât di un re a vegnin limitâts. Si cite, simpri in Ingletiere, il “Magnum Concilium” di ete Normane, une specie di assemblee là che i sorestants de glesie e dal mont feudâl si riunivin dome par esprimi un parê consultîf al lôr re. Inte pagjine che e ven dopo si fevele des “Constitutiones Melfitanae”, voludis dal Imperadôr Fidrì II di Svevie, intal 1231. Dopo si fâs un salt fin ai stâts nazionâi de ete moderne, ven a stâi il secul XV. Pussibil? Di nissune bande, ma nancje lant a cirilu inte bibliografie, si fevele dal Parlament de Patrie dal Friûl, istituît tal 1228 par volontât dal Patriarcje Bertold von Andechs (1218-1251).
◆ Par jessi scrupulôs e precîs, il plui antîc document vignût fûr di cheste istituzion impuartantone al puarte la date dai 14 di Avost dal 1228. Une assemblee tant plui impuartante di une curie feudâl antighe, dal moment che e vantave dirit di rapresentance no dome pai siôrs dai cjistiei o pai grancj esponents de glesie, tant che i abâts o i clerics, ma ancje pes Comunitâts là che la componente borghese, ven a stâi marcjadants, nodârs, juriscj, artesans a volevin difindi i lôr dirits e fâ sintî la lôr vôs. Cuant che e je rivade Vignesie intal 1420, lu à mantignût. No à vût il coraç di sierâlu, ma di fat lu à svuedât di chê autonomie e di chê impuartance che al veve. E cussì, al è lât indenant adiriture fin al 1805, cuant che al à finît di lavorâ dal dut. Ma ce isal un Parlament cence une Costituzion? Ce grant om, e ce grant patriarcje Marquart, il fi di Indrì di Randeck, cavalîr de Svevie! Fin di subit al veve dimostrade une grande passion pal dirit. E in efiets, al veve studiât a Bologne par cinc agns i codiçs e i manuscrits che i derin la licence di insegnant universitari. Il Friûl lu cognosseve plui che ben, se bielzà ai 16 di Mai dal 1336, cuant che al veve dome trente agns, al vignì clamât a direzi la prepositure di Bamberg, che e controlave dute le Valcjanâl e il so bosc grandonon. Nomenât patriarcje di Aquilee ai 23 di Avost dal 1365, nol lassarà cori nancje un an dal so insediament cence regalâ ae Patrie un gnûf ordenament judiziari. Inte date dai 23 di Avrîl dal 1366, inte sede dal Parlament patriarchin, si metè man a une grande riforme dal dirit par preparâ un imprest adat ae modernitât dai timps. Cussì, Marquart al metè adun une comission di predis, nobii e rapresentants di dutis lis comunitâts: insome, une assemblee costituente vere e proprie, rispietose de rapresentance di ogni ordenament civîl. Il lavôr al vignarà considerât ben fat e impuartant, tant che ai 11 di Jugn dal 1366 a nassin lis “Constitutiones Patriae Foriiulii”: un lavôr fondamentâl, che al cjape sù une esigjence antighe, là che za il preseât patriarcje Bertrant, tal 1336, al racomandave di meti par iscrit il dirit dal Friûl, cuntune atenzion particolâr pes categoriis plui indifesis, ven a stâi i fruts, i vuarfins, lis feminis, massimementri chês che a vevin di maridâsi e a podevin vê problemis di dote. Insome, une azion sociâl che ancje in dì di vuê e reste esemplâr, model di sapience e di justizie. La grande intuizion di Marquart e fo ancje chê di meti in man i documents di rielaborâ a une comission di esperts furlans: no int che e vignive di fûr, che no veve esperience des esigjencis dal vivi nostran, ma professioniscj preparâts e tal stes timp inserîts inte vite di chês comunitâts che a varessin vût di jessi regoladis de gnove leç. Il gnûf si spose cul antîc, la modernitât e scolte la tradizion. Tal 1371, ai 16 di Novembar, il patriarcje al zonte ae Costituzion une vôs incredibilmentri urgjente: ancje lis feminis a varan il dirit inte sucession de ereditât tant che i oms. Nissune maravee che pôc plui di cent agns dopo, l’umanist furlan Pieri Zocul al decidè di tradusilis dal latin intune opare publicade inte buteghe udinese di Gjerart di Fiandre in plene dominazion veneziane: al sarà il secont libri stampât in Friûl. Il prin al jere il ricetari di cusine dal patriarcje. Insome, se si trate di un bon vivi, si scomence de taule e si va indenant cul dirit! ❚