CE SUCEDEVIAL IN CHÊ VOLTE TAL MONT? Le penisule iberiche, cove di lenghis e culturis sioris di ricjece e bielece

La penisule iberiche, inte Ete di Mieç, e à rapresentât un grup cetant interessant di civiltâts diferentis che ducj i potents di turni a àn cirût, îr come vuê, di normalizâ. Par cierts aspiets, e somee al profîl de nestre Patrie: Celtis, Grêcs e Africans, Rome, i Visigôts, i Araps e – tacant dal 1212 – la riconcuiste dai Cristians, che no à dal sigûr sparagnât ferocie e crudeltât.
◆ Za ae fin dal ’300 si impon, in ducj i teritoris “liberâts”, une cristianizazion sfuarçade di môrs e di ebreus, cun tant di document uficiâl firmât intal 1391, là che si impon le conversion ae fede cristiane. Se i contadins a muerin di fam, lis corporazions di artesans de lane a deventin cetant sioris, slargjant i pascs e gjavant il pan ai puars. Il ream cristian plui grant sul tacâ dal secul XV al reste la Castilie, intant che la Aragone, un pôc ae volte, e strenç leams cu lis fameis plui impuartantis de Navare e de Catalogne. La prime metât dal ’400 e je la epoche di aur dai Aragonês, che sot de vuide dal re Alfonso V (1416-58) a cjapin sot di lôr il control dal ream di Napoli (1442), trasformant il Mediterani intun mâr aragonês.
◆ Intal 1469 si celebre il matrimoni dal secul: Ferdinant di Aragone e Isabele di Castilie. La arme de Sante Incuisizion e deventarà strument perfet par controlâ il popul, imponint une uniformitât di pinsîr che e metarà la glove ai inteletuâi e e coparà la culture popolâr contadine e pastorâl, che e viveve di magancis, liendis e intersezions culturâls cetant sioris di ricjece e bielece e che invezit aromai a vignaran boladis tant che eretichis o, piês, espression dal demoni e dai siei ingjans. Une vore plui interessant invezit al è ce che al sucêt intal ream de Lusitanie, miôr cognossût cul non di Portugal. Fin des sôs origjins mitichis al rapresente il contrari di ce che al sucêt in Spagne, la esaltazion de diversitât e dal miscliç. La tradizion e vûl che al sedi stât fondât dai cavalîrs templârs intal 1117, che a varessin puartât in tiere lusitane il Sacri Graal: il Portus Graalis (il Puart dal Graal) al varès dât il non al teritori. Il re Indrì III (1394–1460), clamât il Navigadôr pe grande passion pal mâr, al varès stiçât la costruzion di une biblioteche nautiche grandiose inte citât di Sagres, là che savis e studiôs di ogni religjon e fede a podevin lavorâ insiemi par une gnove vision dal mont, fondade su  la cognossince, la culture, la tecniche e la sience. Al sarà il prin responsabil de tradizion dute portughese pe esplorazion gjeografiche, organizant tra il 1420 e il 1445 le gnove cartografie ocidentâl, là che pe prime volte a vignaran segnadis su lis pergamenis Madera, lis Azoris e Cap Vert. ◆ Il so bibliotecari al veve il cognon di Perestrello. Propit come la femine di chel Cristoful Colomp che, dopo un incident di mâr, al sarà ospit propit di chê biblioteche, puartant vie salacor no dome l’amôr di une fantate, ma ancje un segret che di li a pôc i varès permetût di fâ un ciert viazut destinât a restâ inte storie. ❚