Manuela Quaglia (par cure di…), No dut al mûr, un viaç tal mont das stories contades da nôno Elio dal Codèt, Trep di Cjargne 2001.
“Ai amîs anzians / che di sigûr chestes / stories las àn sentudes / come me. // A chei di mieze etât / che, tornant cul pinsîr / aes lôr famees, / a sintaran par un / moment vicins / i lôr cûrs. // Ai zovins, che pûr / distrats de vite / frenetiche di vuei, a ur rive il timp / di scugnî fermâsi un / moment…”
E je la dediche che e vierç chest libri di passe cent pagjinis e che e compagne (p. 10) la fotografie di Elio Craighero, nassût a Trep ai 6 di Novembar dal 1913. Un om di chei di une volte, un om che al saveve tantis storiis e che al saveve contâlis. Une trentine di chestis a son racueltis culì, dividudis in cinc cjapitui: Un mac di contes, Stories e storiutes, Stries e striaments, Ator pe Cjargne cul Signôr e cun S. Pieri e Triscj spirts. Personaçs e situazions a son, dispès, chei stes che o vin cjatâts in altris flabis de tradizion furlane e no dome furlane: l’apontament cu la muart che si rimande, la mari di S. Pieri, i guriuts, il basalisc, l’orcolat, la tavaie e il baston magjics, Silverio e v.i. Ma a son ancje bielis sorpresis cun Dialibus andaribus e Domine Prodomine. Dutis contadis e scritis intal biel furlan cjargnel (la traduzion par talian, in rimpet, e je di Paolo Paron).
In plui des contis, a son ripuartâts i tescj di filastrocjis famosis tant che “Dontri vignîso”, “La moscje e il gri”, “Din don campanon”, e v. i. Ma la perle dal libri e je, salacor, un grimoire, vâl a dî un librut di formulis magjichis (undis), saltât fûr di un vieri scansel. Scritis intun talian che al clope, e nancje tant facilis di lei par vie dal timp che al à ruvinade la scriture (a son riprodusûts i tescj origjinâi scrits a man, cu la version a stampe da pît de pagjine), nus insegnin ce maniere che o vin di fâ par fâi cuintri ae fiere, ae epilessie, ae impotence, aes disgraciis in famee, ai nemîs, aes emoragjiis e v.i. Un document di impuartance antropologjiche e storiche straordenarie.
Il libri al è insiorât di une schirie di bielis fotografiis de Cjargne e di un cd: duncje, no dome lei ma ancje scoltâ ce che si à let. ❚
