Lezions-conciert intes scuelis dai teritoris
cjapâts dentri fin a Otubar 2020
Il progjet european “La Via della Musica/Strasse der Musik”, intal cuadri des ativitâts leadis ae promozion culturâl dai teritoris de aree HEurOpen, ven a stâi Cjargne, Valcjanâl e Carinzie intal ambit di cooperazion Interreg V-A Italie-Austrie, al à scomençât a meti adun la seconde fase des propuestis e des azions finalizadis a pandi la culture musicâl tant che element di cressite e di insiorament pes popolazions locâls e pes scuelis, e come strument di valorizazion teritoriâl in clâf turistiche.
I ents cjapâts dentri, o ben lis Uti de Cjargne, il Comun di Malborghet-Valbrune, la Fondazion Luigi Bon tant che lead partner e la associazion austriache Via Iulia Augusta, a àn viodude la realizazion de prime fase in Istât, cu la costituzion de orchestre alpine HEurOpen formade di une cuarantine di zovins musiciscj in vie di specializazion tra i 16 e i 28 agns e origjinaris di Italie e di Austrie, formazion che è à tignût concierts pai festivals Risonanze, Iulia Augusta Konzertommer e Carniarmonie. Cumò, invezit, a son lis lezions-conciert intes scuelis dai teritoris cjapâts dentri a caraterizâ la iniziative. Une ativitât par fâ cognossi i patrimonis musicâi ai students des scuelis secondariis di prin e di secont grât, cun intervents teorics e pratics che a viodaran il coinvolziment di grups musicâi, esperts in musicologjie e juste apont arlêfs dai istitûts de aree HEurOpen.
A son vot i incuintris programâts fin a Otubar 2020, che a saran struturâts in cheste maniere: lezion-conciert pai students, conciert serâl viert a dute la popolazion e a titul gratuit, un secont incuintri cu lis classis coinvolzudis cuntun espert par aprofondî la esperience di scolte e par infondi ai zovins un spirt critic madûr, in gracie di confronts, opinions, cognossincis storichis, il dut cul jutori di supuarts multimediâi e audiovisîfs, percors vuidâts e riflessions fatis insiemi.
Il prin apontament si è davuelzût tal Museu Etnografic dal Palaç Venezian a Malborghet, ai 21 di Setembar, cu la partecipazion dai students di prime e di seconde superiôr dal Liceu Sientific e Sportîf e dal Istitût Tecnic Turistic di Tarvis. Ospits e protagoniscj de lezion, il Collegium Pro Musica componût di Stefano Bagliano al flaut dolç, Fabio Missaggia al violin, Carlo Zanardi al violoncel e Alberto Busettini al clavicembal, cun musichis di compositôrs nassûts o che a àn lavorât in chel di Gjenue: Agostino Guerrieri, Michelangelo Rossi, Martino Bitti e Alessandro Stradella. Apontament che al à vût come titul “Maraveis dal Baroc” e che si è concentrât propite su la storie musicâl taliane jenfri XVII e XVIII secul, cun diviers repertoris di musiche di cjamare, tra Sunadis, Sinfoniis, musichis par balet e Concierts.
L’interès dai students al è stât grant, sedi tal cognossi la origjin e lis carateristichis de epoche in cuistion, sedi tal capî la nassite e la evoluzion dai struments musicâi sunâts dai musiciscj, cun dutis lis lôr carateristichis di forme, costruzion e cualitât sonore. Argomentazions che a àn tignût cont, in particolâr tal cjamp de liutarie, de grande tradizion e des fameis leadis ae costruzion di struments musicâi in Friûl, come i Morassi – al va al complant Zuan Batiste il merit di vê “scuviert” il len di risonance de Val Saisere -, i Zanin, ma ancje i Della Corte, i Sellenati.
I prossims incuintris, tra Cjargne, Valcjanâl e Carinzie, a laran a tratâ altis epochis storichis de musiche, come il Classicisim, il Romanticisim, la Contemporanie, e no mancjaran di presentâ altris fatôrs leâts ae divulgazion musicâl e al fâ musiche, come il fenomen dai compositôrs e musiciscj enfant prodige o lis pratichis leadis ae costruzion di struments musicâi cun materiâi di scart o de vite cuotidiane. Un grant progjet, “La Via della Musica/Strasse der Musik”, che al supere i confins intal non de condivision de art musicâl. ❚
Alessio Screm
