Sfuei Mensîl Furlan Indipendent
Archivi de Patrie

UNE FURLANE A ROME. A tu a tu cul pilote dai papis

............

«Mi sint cetant fortunât, o soi rivât a mudâ in realtât il gno sium». Alberto Colautti di frut al cjalave il cîl di Monfalcon e si imagjinave ae vuide di avions pronts a sorvolâ il mont. Vuê, il bisiac dal borc di Aris-San Polo al è il sorestant dai pilotis Airbus de Alitalia a Rome.

15 mil oris fatis sui avions e une professionalitât metude a disposizion dai svoi papâi. «E je une emozion di no crodi e un privileç par me che o soi un cristian ferbint. O ricuardi di jessimi comovût pe viertidure dal An Sant di Pape Francesc inte Republiche Centriafricane. La situazion politiche e jere ingredeade e no ducj a conseavin al Pari Sant di fâ cheste fermade. A pene imbarcjât, nus à domandât in ducj i mûts di puartâlu là, e se no fossin rivâts, di dâi fintremai un parecjadudis. Mi à colpît la sô determinazion intal judâ cui che al à plui dibisugne e – cuant che dopo o sin tornâts indaûr – la felicitât sculpide su la sô muse».

Al conte de gjonde di sorvolâ la splaze di Copacabana in Brasîl cun miârs di fantats in spiete de Zornade mondiâl de zoventût e dopo il Sri Lanka, Cuba, i viaçs cun Pape Benedet XVI, i messaçs e la benedizion mandâts a ogni popul cuant si travierse il spazi aeri di diviers Stâts.

Classe 1961, Colautti al frecuente l’istitût tecnic aeronautic e al scomence a svolâ za a 16 agns. Al jentre in curt inte Marine Militâr e al tache a zirâ il mont.

Prime intai Stâts Unîts, dopo di gnûf in Italie fra La Spezia e Catania. Intal 1986 al jere imbarcjât suntune nâf puarte elicotars in Indie, cuant che al è vignût a savê dal concors in Alitalia. Un amôr pal svolâ che lu puarte ancje a judâ cui che al sint ansie dome ae idee di alçâsi in svol. Une pôre irazionâl e di no podê gjestî che e passe midiant di conseis e struments furnîts dilunc dai cors dal program “Voie di svolâ”.

La stesse serenitât che Colautti al sint inte tiere là che al è nassût: «O torni dispès a Monfalcon, mi plâs cjapâ la biciclete e pedalâ fin a Cividât, Palme. Tornâ mi permet di ricjariâmi, di cjatâ fûr part de mê famee e in pôcs dîs ancje la cadence de lenghe». ❚

Floriana Bulfon

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +