NO PAR FURLAN, MA BOGNS. Dixebra, dal 1987 combat rock par asturian

Dixebra,
Uviéu – 19.09.2017,
L’Aguañaz, 2018
A l jere il 1987, des bandis di Avilés, tes Asturiis, doi fantats di vincj agns, Xune e Maniegu, plens di passion pe musiche e pe lenghe asturiane, a decidevin di meti adun cuntun pôcs di altris amîs un grup rock. A vevin iniments chel che za di cualchi an tai media specializâts iberics a clamavin “rock radical vasco”, un moviment di musiche gnove, alternative e ruspiose cjantade par basc, e par chel si vevin domandât: «Se lôr lu fasin par euskara, parcè no podìno fâlu noaltris par asturian?». E je nassude cussì la band dai Dixebra, un progjet artistic e salacor ancje politic che in passe trente agns al à dât tant, sedi in tiermins di cjançons, di discs, di concierts e di emozions tant che sburt par altris gjenerazions di zovins asturians a fâ musiche gnove inte lenghe proprie. Tal 2017 il grup al à fat fieste pai siei prins trente agns di vite cuntun disc e cuntune schirie di concierts. L’ultin di chei, fat ai 17 di Setembar a Uviéu, al è stât regjistrât e al è deventât un cd che, cun disenûf scais di combat rock cun lidrîs punk e influencis ska, rap e folk, al da cont di fuarce, di energjie, di snait e di ispirazion. ❚
M. S.