NO PAR FURLAN, MA BOGNS. Ethnos & Demos, informazion e documentazion in rêt su identitâts e dirits

Ethnos & Demos. Identità, diritti, cittadinanza e integrazione in Europa:
http://ethnosdemos.wordpress.com – www.facebook.com/ethnosdemos
Di sù par jù un an e mieç cui che al à voie di cognossi e di capî alc di plui in cont di identitâts, dirits, citadinance e rivendicazions e pratichis di autoguvier, lant ator pe rêt, al cjate un spazi dopli di informazion e di documentazion.
Di une bande al è un blog cun articui di aprofondiment o di coment su storie e atualitât e di chê altre si cjate une comunitât di Facebook là che a vegnin metûts in comun, segnalâts e comentâts sedi i tescj origjinâi publicâts sul sît dal grup che un grum di altris documents e gnovis. In ducj i doi i câs il titul al è Ethnos & Demos. Identità, diritti, cittadinanza e integrazione in Europa. Si va de segnalazion di jessudis editoriâls – libris, rivistis e altris publicazions – a events, iniziativis e articui e intervistis che si cjatin su altris mieçs di comunicazion.
I articui dal blog a son par solit par talian, intant che lis risorsis segnaladis e condividudis su Facebook a son in plui lenghis.
Daûr dal progjet al è un grup di gjornaliscj e studiôs des cuistions nazionâls, regjonâls, des minorancis e des migrazions che a son in stât di garantî competence, atenzion e sensibilitât culturâl viers di chescj argoments. ❚
Marco Stolfo