CRÔS A ZUI

Dificil di contâ ce che si sint dentri. Une vore dificil.
A viodi dutis chês crôs inflochetadis, metudis in cercli di front de Crôs Mari di Sant Pieri in Cjargne, ti si sglonfe il cûr pe emozion. No je dome une cerimonie religjose. Al è un rituâl antîc, no vieri. Vieri al è ce che al è passât, antîc al è ce che al manten la fuarce des lidrîs simpri vivis di un popul. E intant che il Prevost di Zui lis clame, lis crôs a rispuindin “E je achìa testemoneant che in 700 e passe agns che si ripet cheste tradizion, vuê come îr, la int a sint la fuarce di rimpinâsi fintremai sul Plan de Vincule par viodi la bussade des crôs e preâ inte nestre lenghe.
Pardabon une cerimonie sugjestive, cuntun soreli timit, ma simpri li a tignîti compagnie intune zornade che e reste tal cûr. E intant che o ven vie cuntune serenitât che no vevi di timp, o cjali jù pe val de Bût, un panorame che ti gjave il flât.
E po si domandisi parcè che la Cjargne le clamin la mari dal Friûl…
Domenie ai 4 di Mai dal 2008, te glesie Mari di Sant Pieri in Cjargne, parsore Zui, si son dadis dongje lis comunitâts religjosis de Cjargne (e no dome, stant che a jerin crôs ancje di parochiis dal Friûl e de Austrie), rapresentadis de lôr crôs. Ognidune, come che e vûl la traduzion, e je inflochetade cu lis curdelis des nuvicis dal paîs, maridadis vie pal an. Come che si ripet fintremai dal secul XIV (ma lis origjins a podaressin jessi inmò plui antighis, n.d.r.), ancje chest an, te dì de Sense, sul plan da Vincule, juste sot de Glesie che e jere sede dal Vescul di Zui, si è davuelte la Bussade des Crôs, rituâl che al rievoche il rapuart che par secui al à regolât il leam tra lis Glesiis che a jerin sot di chê Diocesi, nassude par volê di Cromazi, Patriarcje di Aquilee (fin dal secul IV).