A ‘nd è ancjemò furlans

Editoriâl da La Patrie dal Friûl di Mai dal 1985, n. 5
Nus à dulît il cûr a sintî, tal indoman des votazions, int di rude fede furlane a berlâ la lôr disperazion parcè che ur à parût, contant i vôts dal MF, che la bataie dai furlans e jere aromai pierdude e che la cuistion furlane si jere ridusude a di un faliment.
Cun grande serenitât e libertât, o podìn dîur che la lôr fadie no je lade lafè pierdude. Che anzit, se no jerin lôr a combati cun coerence e continuitât zornade dopo zornade, an dopo an, i vôts dal partît autonomistic a saressin stâts cetancj di mancul, e che, se no combataran plui, alore sì ve che e sarès grivie pardabon. E chest no lu disìn tant par consolâju, ma parcè che o partìn di une convinzion di fonde: che la “cuistion furlane” no si identifiche cuntun partît e che cheste stesse idee di Friûl, che si puartìn daûr come ereditât storiche preziose, e va mudantsi cul passâ dal timp e cul presentâsi a la ribalte de storie des gnovis gjenerazions.
La “patrie”, come che le intindevin i prins, grancj ideatôrs di cheste bataie sacrosante, no esist plui. Parcè che o sin gambiâts nô. E i paris dal Friûl, apont par vie che a son paris, a àn di vê vût fîs. E di cuant mai in ca i fîs sono une copie spudade dai gjenitôrs? E, seconde domande, isal just che i fîs a scuegnin par fuarce rispielâsi in chel che ju à fats? La vite e je un lâ indenant seguitîf, magari a madrac vie, ma un lâ indenant. E ancje il Friûl di vuê nol podarà par mai jessi il Friûl che lu àn lumât, tune grande vision profetiche, i fondadôrs de cuistion furlane. Nô, che o sin i lôr fîs e i lôr nevôts, o vin di dâ une man par fâ sù un Friûl che al sedi un spieli dal nestri mût di vivi e di viodi lis robis. Simpri furlan, simpri compagn te sostance, ma diferent tal mût concret. Parcè che o sin e o vin dirit di jessi diferents. Cun grande pâs dai nostalgjics, a Turoldo vie, che ogni volte che a tornin chenti dal lôr singarâ plui o mancul spirtuâl e obleât, a cjatin un Friûl simpri mancul “furlan”. E lôr, sono simpri chei?
Ma a ‘nd è ancje une altre reson, e o cirarìn di sclarîle. No esist une cuistion furlane che si puedi e che si vedi di cjalâle cuntun sôl misurin. E chest a àn di capîlu ancje i rapresentants dal MF. Ciertis ideis (al è il câs di dî par furtune) no son monopoli di nissun. Parcè che a son veris e a son imbrucjadis. Pa la cuâl ce che al podeve jessi patrimoni di un partît nassût tun timp ben definît e cuntune suaze storiche che no je plui chê, cumò si è slargjât, al à ciapât pît. E cjapant pît e slargjantsi, al à cjapât altris tonalitâts e altris clâfs di leture. Cun chest o vin di vêi agrât al MF ma o vin ancje di preâlu di fâ un pas psicologjic, che al coste simpri: di rindisi a di un pluralisim.
Se a la fin dai agns 60 cierts nons a jerin emblemis, i unics, di une idee, cumò cheste idee le puartin indenant ancje altris di lôr, che no son par chest mancul furlans, ancje se a vivin fûr di chê parochie. No si riferìn, naturalmentri, al trio meridionâl che si è presentât dapît da jet dal Friûl par vuarîlu usance i trê miedis dapît dal jet di Pinochio. O intindìn i centenârs e centenârs di personis che, metintsi in liste tun partît o ta chel altri, no crodin di rinunziâ a la lôr fede furlane. E o volìn sperâ, ta chel spirt di “autonomie” che al à di jessi la anime des aministrazions locâls, che a lavoraran ancjemò pal Friûl. Par altri si scuen ameti che il tant che al è stât fat in Friûl ta chescj agns al è merit ancje di int che no à la tessare dal MF ma che si bat pai problemis furlans salacor cun plui vivarositât e clarece. Senò cemût si spieghino lis firmis pe universitât, chês pe autonomie di Triest, l’afiet che la int e à par “Onde Furlane”, il slargjâsi de toponomastiche par furlan, lis publicazions di ogni gjenar, lis iniziativis culturâls, la ativitât de “Glesie Furlane”, i grops culturâi, musicâi e di teatri, l’art, i sfueis locâls, la stesse urbanistiche induvinade de ricostruzion? Al vûl dî che furlans a ‘nd è e tancj ancje. E se il partît dai furlans al sta calant, nol à di calâ l’impegn dai furlans tai partîts. Cui si sintial di sustignî che cierte int no àn dade e no stan dant une man pal Friûl?
Si tratarà di stâur sot, di invoiâju, di judâju cu la critiche e ancje cu la laut cuant che a meretin. E se la nestre int e vote chei partîts e chei oms li, al è un segnâl che no si sint tradide te sô fede furlane. E nancje no si pues pensâ che a sedin ducj stupits o vuarps!
La strade di fâ e je lungje e fadiose. Cuintri de tentazion di voltâsi indaûr cul cûr sglonf di nostalgjie o di mandâ a trai dut cul cûr sglonf di rabie, o disìn che lavôr a ‘nd è tant che si vûl e che ducj i furlans che a son jentrâts tes aministrazions comunâls e di provincie (e de Regjon n.d.r.) a àn la pussibilitât e il dovê di fâ tant par no disfigurâ la muse dal nestri Friûl. Un Friûl edizion di vuê, monopoli di nissun e patrimoni di ducj.