LIS PARABULIS DI PRE ANTONI. I miei cjanuts

Cheste parabulute, cence jessi eresiastiche, o pensi che si puedi metile dongje di chês dal Vanzeli. No ise ancje cheste une maniere di presentâ chel Diu Pari che Jesù Crist nus mostre tal Vanzeli? Un Diu afetuôs, premurôs, bon cundut che l’om al fâs lis sôs macacadis. Un Diu che ancje cuant che nô si slontanìn di Lui, Lui nus pense.
pre Roman Michelot
I miei cjanuts a son come ducj i cjans di chest mont, ancje se par me a son i plui biei dal mont.
No mi fâs nissune ilusion che lôr a deventin mats par me, ancje se, ogni volte che ur voi dongje, mi fasin mil fiestis.
Po stâi che lu fasin par interès, parcè che ur puarti simpri dongje alc di bon. Ma mi fâs plasê istès che lôr mi fasin fieste. Mi plâs pensâ che lu fasin ancje par afiet; tant no mi coste nuie a pensâlu.
Cuant che o voi vie, soredut cuant che mi capite di lâ lontan, o soi sigûr che lôr no pensin par me, ancje se cualchidun mi conte che, sul imprin, a son come distudâts.
Però o soi jo che o pensi par lôr e mi domandi ogni moment ce che a fasin, se a penin, se a àn mangjât, se a àn bevût, se a àn frêt e vie discorint.
La fortune dal miei cjans no je chê di pensâ pal paron, ma di vê un paron e un amì che al pense par lôr.
Mi plasarès che il ream di Diu si podès imagjinâ cussì. ❚
pre Antoni Beline