NO SON PERAULIS PAR VECJOS. Tapis roulant

Mandi nono!
Mandi frute, ce ben che ti viôt!
No masse, nono, o ai di butâ jù cualchi chilo.
Voaltris feminis! Simpri daûr a chel cirî di lâ jù di pês! No savêso che i vues a vadin ben pai cjans? No tu scomençarâs mighe a fâ la diete e a no mangjâ plui nuie?
Ma no, nono, no stoi masse a bacilâ daûr des dietis. O ai decidût di cjoli un tapis roulant.
Sêstu mate, frute?
Parcè po, nono?
Lu sai che cumò e je tornade la mode di fâsi dut in cjase come une volte, ma lis pirulis no! Chês lassilis fâ ai miedis!
Ce centrino lis pirulis, cumò?
Tu âs dite tu che tu âs voie di cjoli un pirulant!
Un tapis roulant, nono!
Eh, un pirulant! No isal un imprest che al covente par fâ lis pirulis? E dopo, scoltimi me, a mi chê robe di doprâ pirulis par dimagrî no mi plâs nancje un pôc. Ai miei timps, si leve a lavorâ tai cjamps e nissun al jere gras! Cence bisugne di chei striaments.
Ma no un pirulant, nono, un tapis roulant. Al vûl dî “tapêt che al rodole”.
Un tapêt che al rodole? O jeri restât a chel che al svolave! E o crodevi che e fos dome une flabe.
Ma nono, no âstu mai viodût un tapis roulant? Al è un imprest par fâ gjinastiche. Al è une strisse che e cor su doi rodui. Tu tu stâs parsore e tu coris. La strisse si môf sot dai tiei pîts, cussì tu tu coris ancje se tu stâs fer.
No mi somee une robe masse inteligjente, cori tant par restâ fer tal stes puest.
Ma e covente par movisi, par butâ jù cualchi chilo!
E no puedistu doprâ dute chê energjie par lâ di cualchi bande?
E covente par fâ gjinastiche in cjase. Cuant che al plûf, o cuant che no tu puedis lâ fûr, tu metis il tapis roulant intal tinel e tu coris.
In sumis, che a sedin pirulis o tapêts striâts, o vês simpri di inventâsi alc di strani par butâ jù chilos.
Nono, tu sâs che mi plâs mangjâ: no ai voie di stâ a diete!
E alore scoltimi me. Âstu voie di dimagrî? Se no tu âs un cjamp, fâs almancul un ort! Tu ti movis e ae fin tu âs ancje cuatri cocins e cuatri cudumars di mangjâ. Chei no fasin nancje ingrassâ!
di Bete di Spere