Virginia Tonelli, Cjistielgnûf, 3 di Novembar dal 1903 - Triest 1944. Nassude inte borgade di Davour la Mont e fie di operaris, ae muart premadure dal pari sul lavôr e veve dome dodis agns, e e je lade a vore par mantignî la famee: e je stade sartore, infermiere, stagjonâl a Vignesie. Sfortunade tai afiets (il morôs i mûr tal 1934), e emigre in France ancje par evitâ di jessi indagade de polizie fassiste par vie dai siei leams cui comuniscj di Spilimberc. De France e continue a judâ chei che a scjampin des ditaturis di Hitler, Mussolini e Franco. Tal 1943 e torne a Cjistielgnûf. E tache cuntune manifestazion di proteste dute di feminis. Dopo dai 8 di Setembar e jentre inte Resistence. Colade intune redade a Triest ai 19 di Setembar, e murarà in Risiere, butade ancjemò vive intal for crematori par no vê pandût nuie a siei torturadôrs.

✒ Agnul Floramo