Europe e Friûl: lis memoriis di Gianfranco Ellero

Di pôc al è stât dât aes stampis il volum Il Friuli in Europa. L’Europa in Friuli. Al è un libri-interviste là che William Cisilino al interviste Gianfranco Ellero: il storic al conte di se in rapuart ai fats e ai acjadiments dal teritori e de Europe. «Al è come Ellero che, tal 1988 – al à vût dit Cisilino – al intervistave il professôr Carlo Guido Mor e cumò jo o intervisti Gianfranco Ellero sui fats storics, su la art, la gjeografie, la politiche e i rapuarts cu la Europe».
E il libri di fat al ripasse un pôc dute la storie dal Friûl e in graciis de forme de interviste al risulte di leture agjile. Il titul cun dentri la Europe al diven de convinzion di Ellero che il Friûl si lu capìs slargjant i studis al contest european, stant che «il Friûl al è chê plui europeane des regjons». Il libri, par talian, al è publicât dal Istitût Ladin Furlan Pre Checo Placerean cul contribût de Provincie di Udin. Inte ocasion de sô presentazion, a fin Otubar intal salon dal Consei provinciâl di Udin, al professôr Ellero e je stade consegnade la Medaie de Provincie pai siei merits di storic. (LPdF)