Tieris antighis e peraulis incjantadis

Tescj di lei e di scoltâ, ilustrazions di cjalâ e di gjoldi e storiis di discuvierzi e di tornâ a contâ. Dut chest si cjate dentri di Tieris Antighis, Peraulis Incjantadis, un progjet editoriâl, metût adun de associazion “Lenghis dal Drâc – Amîs di Onde Furlane” cul jutori de ARLeF, che al met in contat il Friûl cu la Europe, su la fonde de narative popolâr.
Lis publicazions a saltin fûr de colaborazion tra Carli Pup, che al à metût dongje i tescj e ju à adatâts e voltâts là che al coventave, e Guido Carrara e Lussia di Uanis, che a àn fatis lis ilustrazions. Cun lôr, a àn lavorât ancje Giulia Spanghero, pe grafiche, e Aida Talliente e Michele Polo, pes leturis regjistradis tai cd in zonte dai libris.
Ogni volum al ten dongje dôs contis compagnadis di une schede di aprofondiment dedicade a lenghis, teritoris e argoments de narazion. Tal prin libri, Il re che al duar, a ‘nd è une dal Gales e une slovene, tal secont – Il frut scambiât – al è un confront tra Scozie e Friûl e tal tierç, che il so titul al è La nuvice incjantade, a son une conte basche e une furlane.
Par savênt di plui: www.ondefurlane.eu/amis e lenghisdaldrac@gmail.com. (Marco Stolfo) ❚