Pensionament a 67 agns par oms e feminis cun almancul 15 agns di contribuzion e base pal calcul dal assegn pensionistic slargjade ai 34 agns consecutîfs là che la retribuzion e je stade plui alte. A son chescj doi dai ponts clâf dal Libri blanc su lis pensions, presentât di pôc dal Ministeri dal lavôr, che al à stât inviât il dibatiment public sul futûr dal sisteme pensionistic.
daûr des proiezions dal ministeri, la riforme jentrade in vore intal 2013 e sta ancjemò vint efiets positîfs e lis cassis dal Istitût pe assicurazion pensionistiche e di invaliditât de Slovenie (Zavod za pokojninsko in invalidsko zavarovanje Slovenije), a varessin di rezi fin al 2022/2023. L’an passât i beneficiaris dai assegns pensionistics a jerin pôc plui di 612 mil (su par jù il 0,5% in plui rispiet al 2014, l’aument plui contignût dai ultins 25 agns). Il rapuart tra contribuents e pensionâts al è stât 1,37 (840.588 contribuents su 612.018 pensionâts) e pe prime volte in sîs agns nol è calât. L’assegn pensionistic net medi intal 2015 al jere plui bas dai 610 euros, intal 2016 i impuarts a varessin di beneficiâ di un adeguament straordenari dal 0,7%. Ma, daûr des previsions, la spese publiche pal invecjament de popolazion e varès di cressi dentri dal 2060 dal 24,7% al 31,5% dal Pil e la spese pensionistiche de 11,8% al 15,3% dal Pil (il nivel plui alt tra i 28 paîs membris de UE). E duncje, daûr dai esperts dal ministeri dal lavôr al bisugne intervignî par timp.
Cu la ultime riforme, la etât pensionabile e ven alçade in maniere graduâl fin a 65 agns par ducj i doi i ses, cussì come il numar dai agns di contribuzion che a rivaran a 24 (cumò a vegnin cjapâts in considerazion i 22 agns consecutîfs cu la miôr retribuzion). Lis cundizions validis intal 2016 a son pes feminis 65 agns e 15 agns di contribuzion o 63 agns e 20 agns di contribuzion, pai oms invezit 65 agns cun almancul 15 agns di contribuzion.
E je la pussibilitât dal prepensionament che però al previôt un sbassament dal assegn su la base dal numar di mês di anticip (il malus totâl nol pues passâ il 18%): lis feminis a puedin lâ in prepensionament a 59 agns e 39 agns e 4 mês di contribuzion, i oms a 59 agns e 4 mês cun 40 agns di contribuzion.
I esperts che a àn preparât il libri blanc, che nol è stât concuardât cu la coalizion di guvier, a proponin ancje la eliminazion dal dirit al prepensionament o la definizion di un malus precîs. Tra lis propuestis e je ancje la introduzion di un mecanisim pal adeguament automatic de etât pensionabile aes futuris tindincis demografichis. Par ce che al tocje il calcul dal impuart pensionistic, in plui de estension dal periodi di contribuzion calcolât da 24 ai 34 agns cu la retribuzion plui alte, e ven proponude la introduzion di un sisteme a ponts fondât sul rapuart tra redit individuâl e situazion economiche.
Daûr dai autôrs dal libri blanc, chest gjenar di sisteme al sarès plui trasparent e al garantirès un calcul plui just des pensions.
cu lis misuris proponudis, i slovens a jentraressin sì in pension un an o doi plui tart rispiet ae normative in vore, ma i assegns pensionistics che a derivin de assicurazion pensionistiche obligatorie a saressin plui alts e a varessin di rivâ a un valôr tra il 60 e il 70% de ultime paie cjapade. La sostignibilitât des cassis pensionistichis però, e podarà jessi garantide secont il ministeri dal lavôr dome se a vignaran cjapadis ancje gnovis misuris par garantî puescj di vore a zovins e lavoradôrs plui vecjos. Tra lis misuris proponudis e je ancje la introduzion di une tasse sul capitâl. I rigjâfs a vignaressin metûts dopo dal Stât tant che contribût al finanziament dal fonts pension.
Lis novitâts che a saran al centri de discussion publiche a rivuardaressin in ogni câs lis gjenerazions che a stan ancjemò studiant o che a son daûr a jentrâ intal mont dal lavôr. ❚
Tjaša Gruden
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +