Sfuei Mensîl Furlan Indipendent
Archivi de Patrie

ZODIAC FURLAN. Leon

............

LEON
Nassûts jenfri i 23 di Lui e i 22 di Avost
Segn di aghe (no, no, o stavi dome mateant: al è un segn di tiere come ducj i segns furlans)
Proverbi: Miôr cent dîs di leon che une dì di leon.
Il leon al è il re di ducj i animâi, juste? No, naturalmentri.
Pai furlans, l’unic vêr re dai animâi al è il purcit. Duncje, al contrari di chei altris leons, il leon furlan nol è ni egocentric, ni masse sigûr dal so fat. Anzit: al stâ li, un pôc in bande, savint che nol rivarà mai a jessi il numar un, parcè che un Sant Denêl o un speck di Sauris de sô cuesse no si rivarà mai a tirâju fûr.
Jessint un leon, però, al è famôs par jessi braurôs, tant braurôs che nol à pôre nancje di lâ cuintri dai telegjornâi e lâ al mâr jenfri lis dôs e lis cuatri.
Tant braurôs che al è bon di cirî parcament in plen centri di Udin in timp di Friuli Doc.
Tant braurôs che une volte un leon al è jentrât in curve Nord al Friuli cu la maie rosse alabardade.
Il segn dal leon al è dominât dal soreli, tant che i buteghîrs di Lignan. Cheste carateristiche e spieghe avonde ben parcè che in Friûl i leons no son dispès in buine forme. Cun di plui, il leon al ten un grum ae sô “criniere”, e cun dute la ploie che al cjape, al è plui facil cjatâ un triestin che al lavore di domenie che petenâ i siei cjavei.
Ve chi il cuadri de situazion: in struc, jessi un leon in Friûl nol è propit come jessi un leon te savane, al è plui come jessi une vacje intun gjalinâr, o un forest (come un dal Venit o de Lombardie) in Cjargne.
La costelazion dal Leon no si le viôt tal cîl dut l’an. Se tu le cjatis a est pôc dopo dal tramont, al vûl dî che e sta rivant la Primevere. Se tu le viodis prime dal tramont, tor misdì, al vûl dî che tu âs parât jù masse Tocai.
Sport: Ogni dì, un leon al jeve e al sa che al à di cori plui svelt dal tapis roulant. Ma prime visiti di impiâlu.
Bêçs e vacancis: la miôr soluzion par preservâ tacuin e polse? Il zoo di Lignan. Par ducj i leons, mangjâ e durmî a gratis. Dome un difiet: pocje privacy. ❚
Bete di Spere

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +