Sfuei Mensîl Furlan Indipendent
Archivi de Patrie

A ‘Felici ma furlans’ il premi dal public pal Roma Web Fest

............

dissen di Giovanni Di Lena

Autori: Alessandro di Pauli, Tommaso Pecile. Regia: Di Pauli, Pecile, Marcuzzi. Durata: 14. Lingua: Friulano. Jenfri i finaliscj rivâts ae seconde edizion dal Roma Web Fest, il prin dedicât aes seriis su Internet, ai 28 di Setembar passât, a jerin ancje lôr: i fantats di ‘Felici ma furlans’, la serie televisive sul “Homo furlanus”. Uniche serie tv in lenghe minoritarie su lis 104 in gare de Italie e dal forest. I nestri no àn vincût (prin premi a “Milano Underground”), ma a son rivâts prins tal vôt dal public: 1.371 like. I autôrs a àn puartât a Rome il cuint episodi che al siere la prime stagjon. Teme de puntade: il rapuart cul bevi. “Beviìno une robe?” e met in sene la tradizionâl bale aziendâl fate in “a furlan way” e zirade li de Ostarie da Pozzo a Udin (le cjatais su www.felicimafurlans.it/stagione1). Cemût ise lade ator pal Maxxi di Rome, là che si è davuelte la premiazion finâl? «Al è stât un acet une vore bon» al conte Tommaso Pecile «ducj a vignivin a cirî i “furlans”. La partecipazion dal public e l’interès dai coleghis al è stât pardabon grant». A jessi plasût tant: «Il progjet locâl, territoriâl, che nol è stât un limit ma un pont di fuarce» al conte Pecile «e la buine cualitât de produzion. E a son stâts ancje incuriosîts de nestre maniere di finanziament dal progjet». ‘Felici ma furlans’ al à sotignût in buine part i siei costs di produzion cui biliets dai spetacui teatrâi leâts ae serie tv. «Dopo di Rome, po, al è come se al fos partît un gnûf interès» al continue Pecile «e cumò in teatri a tachin a rivâ ancje i zovins che prime nus cjalavin dome su YouTube». Daspò de prime stagjon, in Mai, cul contribût dal Arlef, e je vignude fûr la seconde: 6 episodis, cheste volte plui luncs (20 minûts) e disvilupâts intune uniche storie. Par cui che al vûl viodi dal vîf lis gnovis proiezions di ‘Felici ma furlans’, e fâsi ancje une cjacarade cui autôrs, al pues là a Bertiûl ai 14 di Novembar, a Maian ai 15, a Cjampfuarmit ai 21, a Forgjarie ai 22, a Rivis Darcjan ai 28 e a Murùs ai 29. ❚
Natascia Gargano

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +