E jere une volte, tes culinis tor Buri, une bolp, che e jere golose di ue.
Une dì, la bolp e veve fam e cussì e je lade dongje di une plante di vît. La ue e jere picjade une vore adalt, masse adalt par che la bolp, che e jere picinine, e rivàs a cjapâle, ancje metintsi a saltâ.
La bolp e cjale ben la ue e va vie: “Chê chi no mi plâs: e je garbe”.
Alore si svicine a di une altre vît, ancjemò plui alte. E cjale ben la ue e dopo e va vie ancjemò: “Te targute dongje de plante a àn scrit “Friulano”. Jo lu clami dome Tocai, e chê chi no le mangji, maledets ongjarês!”.
Cjaminant e cjaminant, la bolp e cjate une tierce vît, plui alte ancjemò, che e veve come une patine parsore. “Chi a àn a pene butât il sulfât, nuie di fâ”. La bolp, jessint furlane, e saveve une vore di chês robis li.
La bolp e va indevant, e te vît dopo e cjate une femine che e mangje pan e coculis: “Cui sêstu tu?”
“Ursule Parussule!”
“Ursule Parussule, ce fâstu su chê vît?”
(il rest de conversazion lu cognossês bielzà).
In sumis: la bolp e rive a la ultime vît de culine, une vît altissime. Ma stant che e je une bolp furlane e che i plâs mateâ, no si rint, e cjape sù cuatri bastons, e fâs sù une scjale, le poie sul tronc e e va a cjapâ sù la ue, no nome par se, ma ancje par altris dôs bolps che a passavin di chê bande. E cun lôr, dopo vê mangjât, e va ancje a bevi alc disint: “O sin bolps, no varìn mighe di lassâsi come cjans?”. E ducj a viverin furlans e contents.

PS: mi domandarês: e la bolp, chê de flabe di Esopo, che e faseve fente che la ue e fos masse garbe dome parcè che no rivave a cjolile? No lu vêso capît di bessôi? Chê bolp li no à nuie ce fâ cun chê de flabe furlane. Une cussì plene di sflacje e jere clarementri une bolp triestine! ❚

Lis flabis
di Bete di Spere