Sfuei Mensîl Furlan Indipendent
Archivi de Patrie

SIUMS DI STORIE. Glesie Furlane, anno Domini 1409

............

La rubriche storiche e continue ma cuntune variazion: cemût saressie stade la storie dal Friûl se no fos lade come che invezit e je lade te realtât? Noaltris o provìn a rispuindi cussì…
***
Cemût che e je lade
Daspò dal grant scjas dal Schisme di Ocident, vierzût tal an dal Signôr 1377, la Glesie si cjatà dividude sot la vuide di doi papis (us ricuardial alc?), un cuintri di chel altri armât. Un a Rome e il so aversari in Avignon. Disputis, scomunichis, visions di une fin dal mont inevitabile, a son il risultât di tante miserie. Tal 1409, finalmentri a Pise si cîr di risolvi la cuistion. Lis delegazions dai doi papis, Gregori XII e Benedet XIII si cjatin cun ducj i plui bogns proposits. Ma i predis a barufin, al ven fûr un ribalton trement, e invezit di sielzi dome che un pastôr de glesie universâl, a ’nt cjatin fûr un tierç, Sandri V, che al mûr cuasi subit, seguît di Zuan XXIII: cussì la situazion si compliche ancjemò di plui, bielzà intorteade che e jere. Gregori XII, stuf di tantis fufignis, al decît di puartâ il Concili a Cividât. E no lu fâs a câs, parcè che al è leât culturalmentri ae glesie di Aquilee. Ma la dì di vierzidure, ai sîs di Jugn dal 1409, Corpus Domini, a saran pardabon pôcs i predis e i prelâts presints. Lu vevin volût boicotâ. Forsit la vision di Gregori e jere masse eretiche, par chei timps. Forsit al veve pal cjâf alc di gnûf, o magari ancje di antîc, salacor peât ae tradizion di Acuilee, come che cualchi studiôs al sta cirint di dimostrâ. Insome, lu fischin. E al scuen scjampâ di scuindon: si imbarcje a Tisane travistît di diacun, par no jessi copât. E di fat, il so segretari, che invezit al jere travistît di Pape, al cjape un frac di pachis e al ven butât cuasi muart in mâr. Di Tisane, Gregori al va jù fin a Lignan, e di li in Dalmazie, par rinunziâ ae fin al titul di Pape, in Pulie, e murî l’an dopo. La crisi e restarà vierte fintremai al 1417, cuant che tal Concili di Costance al tornarà a jessi un sôl pape, chel di Rome, cul non di Martin V.
***
Cemût che e podeve lâ
Papis e cuintripapis, arcidiaui, striaments, visions. Fraris che a predicjin la Apocalìs. Manuscrits che a piturin pardut la vignude dal Anticrist. Cussì, Gregori XII al veve decidût che la Glesie e varès vût di cambiâ ande. O Rome o Avignon, nol cambiave propite nuie: predis mangjons, ignorants, beçons spindûts dibant par sglonfâ un lustri fat di bufulis e di nuie, mentri che la puare int e murive di fam. Il Vanzeli al veve une altre idee. Duncje, il ribalton dal Schisme al podeve ancje trasformâsi intune benedizion. Une grande oportunitât par pensâle diferente, la Glesie di Crist. Plui dongje a ce che e jere tal so nassi. Puare, vivificade di une dotrine savinte e condividude. E Cividât e podeve jessi il lûc ideâl par convinci ducj che une gnove ete e jere pronte par vierzisi al mont. Gregori, di fat, al saveve masse ben che Cividât e jere une realtât cosmopolite – un miscliç di latins, gjermanics, sclâfs e furlans, cuntune grande comunitât ebraiche -, candidade dal Patriarcje Bertrant a vê une sô Universitât za dal 1350. Visionari, al crodeve plui tai valôrs de culture e de sapience che tal dogme di une Glesie vecje e masse atente a scombati pai siei privileçs plui che a stâi daûr ae sô mission. Gregori – al secul Agnul Correr – al è nassût a Vignesie ma al à un grum di leams cul patriarcjât di Acuilee, là che jenfri i siei munistîrs al à passât tant timp a studiâ e a formâsi: ambassadôr pontificâl in Istrie e in Dalmazie tal 1387, patriarcje di Costantinopoli dal 1390 e tal 1405, adiriture cardinâl di Sant Marc e duncje fuart di un leam cu la Glesie de Patrie, ven a stâi par vie dal so stes fondadôr! Partît di Cividât tal 1409, al varès vût di jessi come tornâ a fondâ la Glesie, scomençant propit di Acuilee. Al è clâr che al saveve che a plui di cualchidun la idee no i sarès plasude. Vignesie e sperave za di tant timp di smorseâ la Patrie, e Rome e veve simpri viodûts i patriarcjins tant che une clebe di eretics stramps, ruspiôs, di tignî sot voli. Ma Gregori al veve fat un sium, cualchi gnot prime. Une vision, e nol rivave ancjemò a decifrâle. Ma al saveve che alc e voleve ben dî. Une cjarte vincente, tignude platade in tancj agns di peregrinazions pai trois di une Europe che no jere ni sot di Rome ni sot di Avignon. E in chê vision a son i mosaics de grande basiliche che a balin intune zirandule sflandorose ducj intor dal simbul antîc di Jone. Il Correr al jentre in Citât cuntune grande procession, propit la dì de Pasche Rosse (Pentecoste): ai delegâts ur ven ufiert un gustâ mai viodût prime, là che dute la popolazion e je invidade a stâ insiemi e a fâ fieste: 72 puartadis, cun tant di gubane (nomenade pe prime volte tai documents) e vin blanc fresc e profumât di rosis, de Badie di Rosacis. “Ecclesia e vûl dî comunitât, fradis miei!”, al pontifiche chel Pape stramp, cuntune lungje barbate blancje e i cjavei disordenâts, sbarlufîts de buere che e tire jù fuarte dai canalons dal Nadison, che tu lu varessis dit Ermacure in persone, se no adiriture Marc, il taumaturc. “E alore, gjoldìn insiemi. Se Rome e Avignon no vuelin metisi dacuardi, alore jo us propon di pensâle stuarte, cjalant a Orient, come che a àn simpri fat i vuestris vons, dai timps di Alessandrie incà. E cussì, us dîs che vuê, zornade di Pasche Rosse, anno Domini 1409, e nas une Glesie gnove, che però e savarà di antîc. Si le clamarà Glesie Furlane, e sarà sûr di chê di Alessandrie e di Costantinopoli, di Kiev e di Atene, di Belgrât e di Odesse. E che nissun om al olsi rompi ce che Diu al à metût adun!”. Al bêf il bon vin, il vecjo pape cu la barbe blancje. Santificât di une promesse. E al torne a pensâ a chê vision de gnot prime. Sigûr i nons di Jone, di Erma, dal Pastôr e dal vescul Teodorì i son clârs, al cognòs il lôr significât. Ju à studiâts. Ma ce varano mai volût significâ chei altris spirts che inte gnot i suelavin intor? Cui jerino mai chei Bellina, chei Placereani, chei Marchets? Siums di une epoche lontanissime e za stade, o di une lontane compagne, ma ancjemò di vignî? ❚
Angelo Floramo

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +