I gjenitôrs di Simona Cigana, zovine gjornaliste muarte a dome 30 agns tal 2007, a àn volût istituî un premi gjornalistic a la memorie de lôr puare fie.
Il concors rivât a la tierce edizion, puartât indevant dal president Piero Angelillo cun dut il Circul de stampe di Pordenon, al gjolt de poie di diviers ents publics e privâts e si sta ritaiant un puest di dut rispiet tal panorame dal gjornalisim talian, come che i à tignût a marcâ il president dal ordin Enzo Iacopino, che al à mandât i siei salûts e si à scusât par jessi stât tratignût a Rome.
I elements cualificants dal premi Cigana a son diviers: prin di dut al à chê di volê jessi un stimul pai zovins gjornaliscj: chest an a àn partecipât 48 di lôr. Al à dôs categoriis, une sportive, grande passion di Simona, e une di inchieste, ven a stâi, come che al è stât di plui voltis vie pe cerimonie di premiazion ai 16 di Novembar a Davian, une des manieris di fâ informazion, forsit dispès tra lis plui discomudis, che miôr a rapresentin il concet di “libertât di espression”.
Cun di plui al valorize ancje il patrimoni linguistic de nestre regjon, lant a premiâ ancje i articui scrits par furlan, sloven e todesc. Propit ta cheste sezion al è stât premiât “I Furlans de Transiberiane” publicât su La Patrie dal Friûl n. 10 di Otubar dal 2011 e scrit di Christian Romanini, che al à ricevût la targhe dal President dal Consei regjonâl par man dal conseîr Maurizio Salvador. L’articul al conte un cjapitul forsit no masse cognossût de epopee de emigrazion furlane: il contribût che lis maestrancis furlanis a àn dât a la costruzioni di chê che e jere ta chei agns la plui grande ferade dal mont, la Transiberiane (www.lapatriedalfriul.org/?p=7921).
Ritirant il premi Christian Romanini al à volût ringraziâ i gjenitôrs di Simona Cigana e ducj i organizadôrs. Tal so intervent al à ricuardât la impuartance de informazion midiant dal ûs des lenghis minorizadis intun moment storic come chest dulà che la globalizazion e riscje di omologâ dut e ducj «Contâ i fats par furlan al significhe no dome doprâ un codiç linguistic, ma trasmeti i nestris valôrs, la nestre identitât».
Sul sît www.stampa-pordenone.it si pues cjatâ il verbâl de jurie e il resocont complet de cerimonie di premiazion. ■

Redazion