LA FABRICHE DAI… LIBRIS – DIBATIT LETERARI. Ocitan e Furlan a son lenghis “rock”

Un libri che al conte la realtât furlane e le met in relazion e in confront cun chê de Ocitanie e cun chês di une schirie di altris minorancis e nazionalitâts ator pe Europe. Il so titul al è “Occitania, Friuli, Europa. La mia lingua suona il rock” e il so autôr al è il ricercjadôr e gjornalist Marco Stolfo.
Il volum al mostre la evoluzion de produzion musicâl in lenghe ocitane e par furlan tai ultins cuarante agns, al presente il contest storic, gjeografic, culturâl, linguistic e politic dal Friûl e des tieris “d’Óc”, cui lôr ponts di incuintri e lis lôr diferencis, e al da cont de relazion tra musiche te lenghe proprie, rivendicazions che a tocjin dirits linguistics e formis di autoguvier teritoriâl e presince o mancjance di azions di tutele e formis di autonomie regjonâl.
Te comparazion tra il Friûl e chê che sul plan gjeografic e demografic e je la nazion cence stât plui grande de Europe a soreli jevât si incrosin storie, societât, politichis linguistichis e creativitât in cjamp leterari e musicâl. La relazion tra lenghe proprie e musiche e ven frontade ancje daûr dal confront cun altris esperiencis, de Sardegne al Paîs Basc e dal Gales ai Paîs Catalans, e su la fonde di une schirie di testemoneancis di musiciscj e operadôrs culturâi. “Occitania, Friuli, Europa. La mia lingua suona il rock” nol è dome un libri di lei, ma al è ancje un cd di scoltâ cuntune selezion siore di rock, folk, reggae e hip hop par ocitan e par furlan, cun cercis dal repertori di grups tant che Massilia Sound System, Lou Dalfin, Lou Seriol, Goulamas’k, Inzirli, Pantan, Arbe Garbe, e Mig 29 over Disneyland.
La publicazion e je stade dade fûr, cul jutori e il patrocini de Provincie di Turin, de bande de associazion Lidrîs e Butui, sodalizi nassût tal 2003 par iniziative di un grup di zovins di divignince furlane che a son a stâ a Turin e inaltrò in Piemont.
Dopo de presentazion fate a O Borc (Borgo San Dalmazzo, dongje Cuneo) inte suaze de “Festa de Lou Dalfin” ai 3 di Novembar stâts, il libri cul cd al vignarà presentât e distribuît ator pal Piemont, in Friûl e inaltrò vie par dut l’Unvier. Par savênti di plui: lidrisebutui@gmail.com e www.lidrisebutui.wordpress.com.
Marco Stolfo, Occitania, Friuli, Europa. La mia lingua suona il rock, Lidrîs e Butui, Turin/Udin, 2011 (libri + cd) ■
Redazion