Sfuei Mensîl Furlan Indipendent
Archivi de Patrie

PAGJINE TECNOLOGJICHE. Autonomisim e lenghe furlane sul web

............

La jentrade dai sits sot acuse e il blog dut par furlan

La jentrade dai sits sot acuse e il blog dut par furlan

Scandai sui portâi de politiche di cjase nestre

Si fasin dongje i apontaments eletorâi dal 2013. Magari cussì no, o forsi biadelore, a son une vore lis cuistions che a movin lis cussiencis. Cualchi teme al è gnûf, cualchidun, invezit, al è un vecjo cognossint. Lis menacis al autonomisim de regjons cun statût speciâl, la riforme des provinciis, de justizie, de scuele, lis grandis infrastruturis sul teritori, lis servitûts militârs, dongje de revisions di spese dal guvier (spending review) che a partin a mudâ il status di tutele des lenghis minorizadis…
Pontìn il scandai informatic su lis fuarcis che si definissin autonomistis o indipententistis te nestre Regjon par analizâ cemût che a doprin l’imprest “Internet” parie cu la lenghe furlane par fâsi cognossi e tirâ potenziâi eletôrs e gnûfs sostignidôrs.
AUTONOMISCJ, MA POCJE LENGHE FURLANE_ Lant daûr dal alfabet, si tache cul Fronte Friulano/Front Furlan, che al à un sît ae direzion www.frontefriulano.org e une pagjine su Facebook www.facebook.com/FrontFurlan.
In ducj i doi, i contignûts par furlan a son in numar pardabon minim, il furlan al è doprât in cualchi pagjine di seconde impuartance e in cualchi messaç scrit dai visitadôrs te sezion “La posta dei lettori”.
Passìn a la Lega Nord Friuli Venezia Giulia. Cheste fuarce politiche no à un sît so, dut câs, sul sît “mari” de Lega Nord, a son segnadis lis direzions des sezions di Gurize (www.leganordgorizia.org) e di Triest (www.leganordtrieste.it). Al esist ancje il sît dal grup de LNFVG in Consei Regjonâl (www.gruppoleganordfvg.it). Nissun dai trê al à contignûts par furlan.
Stes discors pal sît dal Movimento Autonomista Friulano (www.movimentoautonomistafriulano.it), espression politiche dongje de associazion Identità e Innovazione (www.identitaeinnovazione.it), ancje tal secont câs… nuie te nestre lenghe.
Finìn sgarfant tes pagjinis dal Moviment Friûl (www.movimentofriuli.it), che al à un sît bilengâl in version furlan/talian. Te version taliane no dut al è voltât, par cui la marilenghe al è l’idiom principâl dai inzornaments. In bande des sezions statichis a son presintis dos sezions: “Friuli d’oggi”, che e à contignût pe plui part par talian, e “Il Tramessîr”, dulà che invezit dut al è par furlan. Si pues lei la promesse di zontâ l’archivi storic di cheste fuarce politiche che e à vût un puest impuartant te storie contemporanie dal Friûl.
ATOR PE EUROPE E PE ITALIE_ Su la Patrie dal Friûl (numar 7, Lui 2010: https://www.lapatriedalfriul.org/?p=4315) o vevin za publicât un articul su trope impuartance che e ven dade te rêt e a lis diviersis lenghis tes campagnis eletorâls e te comunicazion des fuarcis politichis in chei altris paîs europeans e tal Stât talian, lassant fûr il Friûl.
Cheste gnove investigazion e mostre che su la Rêt la espression politiche furlaniste e je une vore piês di ce che a proponin i partîts di chês altris minorancis de Republiche Taliane.
Un fat pardabon stramp, stant che te storie dai furlans la cuestion lenghistiche e je, forsi, la prime nestre risultive identitarie. Mantignî un sît plurilengâl al coste fature, si capìs, e al tocje vê una paronance alte di une lenghe par doprâle intun scrit di politiche. Isal chest il parcè d est vueit?
O isal par vie che si pense che i potenziâls eletôrs no savedin il furlan? O che il tontonâ su la difese e sul disvilup de tutelis pal furlan nol puartedi preferencis?
CHEI ALTRIS_ fûr de aree dal autonomisim nostran si movial alc?
O vin cjatât dome il blog fûr par fûr par furlan de sezion di Palaçûl dal Partît Democratic http://partitdemocratic.blogspot.it – ma se o vês altris segnalazion, a àn il bon acet! ■
Michele Calligaris

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +