Sfuei Mensîl Furlan Indipendent
Archivi de Patrie

AUSTRIE. Il president cravuat Ivo Josipović tal Burgenland

............

Magari cussì no, in Austrie cuant che i media si ocupin des minorancis a ripuartin dome i imberdeis leâts ae segnaletiche bilengâl in Carinzie. No mancul interessante dal pont di viste storic e je la situazion dai cravuats tal Burgenland. Graciis ae lôr vicinance ae capitâl a son stâts scuasit simpri politics cravuats ancje tes posizions plui altis tal guvier austriac: cumò o vin doi ministris cravuats, Darabos e Berlakovich.
I 6 di Novembar di chest an a son stâts une zornade storiche par chê piçule minorance: il prin om de Republiche di Cravuzie Josipović al à visitât dut il lôr teritori, scuasit ogni lûc, paîs dopo paîs, dal nord al sud. Pe minorance cravuate al è stât cence dubi un event positîf fûr dal vade: dapardut i àn dât acet di cûr. Viodût che il president cravuat si cognòs ancje tant che compositôr di musiche, al à incuintrât ancje il plui innomenât compositôr de minorance cravuate Štefan Kočiš. Il Burgenland, patrie di Haydn e Liszt, al è ancje un paîs di musiche.
Intune interviste pe television statâl ORF, al à sotliniât soredut la impuartance di mantignî la lenghe di minorance che, magari cussì, no si cjate za su la liste de Unesco des lenghis in vie di estinzion. La situazion e je pardabon preocupante: intes fameis cravuatis si dopre la lenghe cravuate simpri mancul e i zovins cussì no saran bogns di passâ indenant chest tesaur. Cuant che i àn domandât al president ce che i veve plasût di plui dulinvie la sô visite, al à rispuint ”il sun de biele variante arcaiche de lenghe cravuate che al ven doprât chenti. Si sintin peraulis che in Cravuzie a son sparidis e no si capissin plui. Jentrant te UE, la Cravuzie e je interessade che i zovins a sedin istruîts inte lenghe mari e a vuardin la proprie identitât nazionâl. O vin di slargjâ i contats cu la Cravuzie e il finanziament de minorance. Par salvâ la lenghe al bisugne dâ la pussibilitât di imparâle e studiâle ancje intes universitâts”. Chestis lis afermazion dal president.
Cui sono i cravuats dal Burgenland?_La designazion di Burgenland cravuat (par cravuat ”Gradišćanski Hrvati”) si riferìs a une minorance cravuate te zone di confin tra Austrie e Ongjarie. Daûr il censiment dal 2001, a vivin tal Burgenland 19.374 cravuats, val a dî il 5,9% de popolazion totâl. I cravuats dal Burgenland a jerin in origjin sfolâts dulinvie lis vueris turchis tai Balcans, in particolâr de Dalmazie, come che si viôt dal fat che e je stade mantignude la lenghe cravuate antighe, che in Cravuzie no si fevele plui. Anzit, tant che linguist o disarès che si trate di un cravuat “pûr”, libar di inflùs serps, un lengaç a mieze strade tra il sloven e il cravuat di vuê.
Daûr documents storics, tra il 1533 e il 1584 cirche 120.000 cravuats si son stabilîts in 200 paîs tal teritori dal Burgenland di vuê.
Incjastrâts tra l’ambient todesc e ongjarês, la assimilazion e je tacade ae svelte. In particolâr, ducj i 60 paîs cravuats te Basse Austrie e chei in Slovachie a son stâts assimilâts sistematichementri intune campagne tal cors de monarchie, cuant che la lenghe cravuate e je stade improibide.
La Prime Republiche_ Daspò la seconde vuere mondiâl, la plui part dal teritori di insediament e je stade assegnade a la Austrie; parts plui piçulis però ancje ae Ongjarie e ae Cecoslovachie. Cirche il 12% dai abitants dal Burgenland a son emigrâts intai Stâts Unîts. Si son stabilîts a Chicago, soredut te citât di South Bend. Ancjemò vuê e esist la associazion cravuate “Bratinstvo” e “Društvo Sv. Antona”. Ai timps de Prime Republiche, e jere in particolâr la glesie a cura lis ativitâts culturâls e educativis.
Tal 1929 e je stade impastanade la plui impuartante organizazion cravuate “Hrvatsko kulturno društvo / Associazion cravuate culturâl”.
Cu la leç di riforme de istruzion, tal 1937 pe prime volte la educazion bilengâl e je stade regolamentade. Daspò l'”Anschluss”, dutis lis associazions cravuatis e la istruzion dal cravuat a son stadis improibidis.
La Seconde Republiche_ Tal 1955 al è stât firmât il Tratât di Stât austriac che al conten la tutele principâl dal grup etnic cravuat tal Burgenland. Tal stes an, la associazion cravuate Hrvatsko kulturno društvo e à domandât al guvier austriac intun memorandum la realizazion concrete dal articul 7. Parts essenziâls di chestis disposizions dal Tratât no son stadis mantignudis fin in dì di vuê.
Tal 1979 a son stâts introdusûts i prins programs radiofonics in lenghe di minorance e dîs agns plui tart al è lât in onde il prin program televisîf. Tal Setembar dal 1992 e je stade vierte la prime scuele di minorance in Oberwart / Borta.
Une gnove ocasion e je rapresentade de democratizazion de Republiche di Cravuzie. Tal dopovuere, i abitants dal Burgenland a vevin dome pôcs contats cul ex regjim comunist in Jugoslavie. Cumò, cul acès de Cravuzie te UE si spietisi une cooperazion economiche e culturâl plui strente. ■
JANEZ ERAT

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +