23 mostris par un memory
che al è ancje un imprest didatic par fruts e mestris
Ce fasino i pitinins di dutis lis fameis dal ream animâl dal nestri marimont par imparâ e par deventâ i grancj de lôr specie? A zuin, ducj a zuin. A zuin framieç di lôr o di bessôi. A zuin discjadenâts o cuiets. A zuin intant che a tormentin i grancj e daspò di ogni zuiade a son ancje lôr pardabon plui grancj e a àn di sigûr imparât alc di gnûf.
E alore, zuiâ al pues jessi ancje une maniere par insegnâ soredut ai plui pitinins. Lu san ben lis mestris des scuelutis che a pararessin divertîsi tant che i fruts. E al è soredut par lôr, pes mestris che a insegnin furlan, e pai frutins, ancje chei dai prins agns de scuele primarie, che al è stât pensât “Il memory dai mostriçs&mostris” là che la peraule “mostriçs” e je inventade. Un memory che al cjape vite des ilustrazions di Maddalena Bathish e dai tescj di Francesca Gregoricchio.
E cuâl frutin no aial mai mostrât tant pôre che curiositât pai mostris, chei tai armârs, o sot dai jets o tal camarin de robe dismenteade, simpri tal scûr?
Met dongje chest, la voie di zuiâ e ancje chê di disfidâsi, e lis 23 tessaris dal memory dai mostriçs e mostris a deventin ancje un imprest didatic par insegnâ la lenghe furlane.
Ogni mostri e ogni mostriç a àn il lôr non e la lôr storie, une storiute scrite intun librut metût dongje des tessaris e che si pues lei cuant che si metin compagnis 2 tessaris cu la stesse ilustrazion. E alore, vie ducj a zuiâ par imparâ e no dismenteâ la nestre lenghe!
La cjase editore e je la Kappa Vu e il memory si pues cjatâlu in librarie o in rêt tal sît de Kappa Vu (shop.kappavu.it). ❚
