ZODIAC FURLAN. Belance

Nassûts jenfri i 23 di Setembar e i 22 di Otubar
Profum preferît: la broade.
Cun pocje origjinalitât, chel che al à inventât l’oroscop al à decidût che chei nassûts sot dal segn de belance a son personis ecuilibradis (o scomet che se invezit de belance al ves cjatade la costelazion dal orloi, a saressin stâts precîs e puntuâi).
A son ancje personis che i tegnin une vore ae justizie, a pesâ ben ogni decision (se a fossin stâts dal segn dal orloi, probabilmentri a varessin tignût une vore a no someâ vecjos).
Ah, e simpri secont di chel gjeni che al à inventât i oroscops, a chei de belance ur plâs ancje la bielece (strani: ducj chei altris a àn miôr lis robis brutis!).
Cemût si tradusino dutis chestis carateristichis intun furlan? Facil: la belance furlane e sta simpri tal mieç, e contente un pôc ducj. Tra il Tocai e il Merlot, par no sielzi, e bêf un tai di un e un tai di chel altri. Tra il frico e il muset, e mangje ducj doi; tra il schi di fonts e il schi alpin, si ferme in baite a fâsi une luianie.
Fevelant di bielece, il furlan nol è propit nassût par jessi artist, se o pensìn a la art come a une robe creade dome par amôr dal biel (pierdi timp intune robe che no covente a nuie?
Ma stino scherçant?). Il sens artistic de belance furlane, alore, si tradûs te piture (chê dai mûrs di cjase, però), te scriture (de liste de spese o al massim di un articul di gjornâl – e cumò provait a induvinâ il segn di Bete di Spere!), o ben te musiche (ma dome par inventâsi i côrs de curve dal Udin).
Sport: cul vuestri amôr pal ecuilibri, us conseìn il patinaç, la gjinastiche artistiche o ben di fâ il camarîr al Tenda di Lignan.
Curiositât: la belance e je la uniche costelazion che e rapresente un imprest inanimât invezit di un animâl o di une persone.
Il fat che e sedi une belance al dimostre che l’oroscop no lu àn inventât i furlans, parcè che se no a varessin sielzût une costelazion a forme di vuarzine. ❚
Bete di Spere