Ai 22 e ai 23 di Avost la coralitât popolâr
e il gustâ gjenuin si cjatin te mont furlane
La Cjargne, o savìn, e je une tiere che e ten cont un patrimoni inestimabil. Tes plêfs antighis, presidis di fede e di memorie sparniçâts tai tancj cjanâi, la storie, la art e la devozion si fondin cuntune identitât comunitarie fuarte e resistente. Al è propit chi, là che la sacralitât e il paisaç si incrosin in ambients di une purece rare e ideâi par un turisim lent, cussient e rispietôs, che e torne “La lungje gnot des plêfs in Cjargne”. La manifestazion chest an e cjape une dimension gnove e inmagante, deventant un pont di incuintri tra diviersis culturis dal Mediterani, dal Tiren, de Cjargne, deventant un moment di grande condivision.
◆ Dopo vê dedicât lis edizions passadis ai côrs locâi, aes jerbis medisinâls, aes feminis cjargnelis, aes vôs blancjis e ae culture transfrontaliere, chest an il progjet al met al centri lis memoriis etnografichis de vocalitât popolâr di trasmission orâl, par une voglade che e passe i confins, puartant in Cjargne lis animis di Sardegne, Corsiche, Sicilie e Ligurie. Tieris diferentis, ma unidis di un rapuart profont cu la vôs, cul paisaç, cu la ritualitât e cu la coletivitât. La musiche corâl e devente cussì une ocasion di cognossince, dulà che il public nol è dome un scoltadôr passîf, ma al è invidât a jentrâ in relazion cu lis comunitâts dal lûc, cui savôrs cjargnei e cu lis vôs che ancjemò vuê a conservin formis di espression antighis e profondis.
◆ Il program al è un viaç straordenari tes tradizions vocâls plui autentichis. De Sicilie a rivin i Lamentatori di Montedoro, custodis dai cjants polivocâi leâts ae Setemane Sante, puartant la densitât rituâl e la fuarce dramatiche dal lament sacri. De Corsiche, lis E Canterine a fasin rivocâ la culture polifoniche de isule, là che il cjant a plui vôs al manten il respîr pastorâl e comunitari. De Ligurie, i Cantori di Sant’Olcese a presentin la vivarositât dal trallalero gjenovês, un cjant popolâr urban cuntune energjie coletive e une musicalitât inconfondibilis. De Sardegne, i Cantori di Bosa a testemonein une pratiche polifoniche masculine di grande potence arcaiche, là che bassu, contra, tenore e cuntraltu a costruissin une architeture sonore severe e magnetiche. E po, a fâ di vôs ospitantis e je la Onoranda Compagnia dei Cantori di Cercivento, che e puarte il cûr cjargnel de manifestazion cu la vilote sacre e profane, documentade almancul dal Sietcent indenant.
◆ No si trate dome di musiche, ma di vite, di teritoris che si cjatin e si contin. No dome un festival, ma un vêr laboratori di identitât. La vôs umane, prime di ogni strument, e je il mieç plui diret par tocjâ la anime di un popul.
◆ La manifestazion si vierzarà sabide ai 22 di Avost aes 18.00, te Plêf di Sant Stiefin di Cesclans, cui Lamentatori di Montedoro e lis E Canterine. Po, aes 20.00, te Plêf di Sante Marie Anunziade di Castoie di Soclêf, si cjataran i Cantori di Sant’Olcese, i Cantori di Bosa e la Onoranda Compagnia di Cercivento.
◆ Domenie ai 23 di Avost e sarà dedicade aes animazions de liturgjie domenicâl. Lis E Canterine a cjantarin te plêf di Dieç aes 9.30; la Onoranda Compagnia e sarà te Plêf di Sant Martin di Verzegnis aes 10.00; i Cantori di Bosa a animaran la messe dal patron te Plêf di Sece di Zui aes 11.00, intant che i Lamentatori di Montedoro a saran te Plêf di Cjanive, simpri aes 11.00, pe fieste di Sant Bortul. Finît ogni conciert, tal segn de condivision, e vignarà ufierte une degustazion di prodots tipics locâi, in graciis dal supuart di gastronoms dal lûc, par celebrâ ancje il gust di cheste tiere.
◆ Il moment culturâl clou si tignarà domenie dopomisdì, aes 17.00, te Plêf di Sant Martin di Çurçuvint. La rassegne si sierarà cuntune taule taronde, esemplis cjantâts e laboratoris par coriscj. A intervegnaran Valter Colle, antropolic e musicolic; Giulia Pisu, docente di etnomusicologjie de Universitât di Casteddu; Luigi Oliva, etnomusicolic e diretôr di côr; e Roberto Frisano, musicolic. A moderâ al sarà cui che al scrîf.
◆ La Lungje Gnot des Plêfs in Cjargne si conferme cussì un progjet culturâl cuntune origjinalitât fuarte. Un percors là che lis plêfs a deventin lûcs di scolte, il cjant al devente memorie vive e lis comunitâts si ricognossin in ce che a àn di plui antîc, fragjil, ma ancje di plui resistent e vêr: la vôs. ❚
