La decime edizion dal Anciuti Music Festival e tocje un moment une vore simbolic, une celebrazion di dîs agns di ativitât dedicâts ae grande musiche e ae valorizazion dai struments a lenghete dople. Il festival, che al puarte il non di Giovanni Maria Anciuti, al onore la figure di chest artesan cjargnel che tal Sietcent al è stât un dai plui impuartants costrutôrs di obois e fagots in Europe. La sô ereditât e je ancjemò vuê vive e e resist, graciis al festival dedicât a chest mestri liutâr, e chest apontament al è la testemoneance plui biele di une tradizion che e devente pont di partence par gnûfs orizonts musicâi.
Par cheste ocasion straordenarie, il festival al da il bon acet a Albrecht Mayer, tra i plui grancj oboiscj dal nestri timp. Prin oboe dai Berliner Philharmoniker dal 1992 indenant, Mayer al è un artist di riferiment de sene conciertistiche mondiâl. La critiche internazionâl al à definît il so sun “miracolôs” e “di cjantabilitât sugjestive”, ricognossintji il merit di vê tornât a dâi al oboe un rûl centrâl tal repertori solistic contemporani.
Il conciert di gale si tignarà domenie ai 2 di Avost aes 17.30 te Glesie di Sante Marie Assunte di For Disore. Albrecht Mayer al sunarà doi fondamentâi dal repertori dal Votcent par oboe, adun cu la FVG Orchestre direzude di Paolo Paroni: il Conciert in mi bemol maiôr di Vincenzo Bellini e la Introduzion, teme e variazions op. 102 di Johann Nepomuk Hummel. A completâ il program, la Sinfonie n. 8 in si minôr D759 “No finide” di Franz Schubert.
Chest apontament al è realizât in colaborazion cun Carniarmonie, confermant il leam fuart tra il festival e il teritori de Cjargne. La musiche e devente cussì un mieç par valorizâ no dome il patrimoni culturâl, ma ancje la bielece dai lûcs dulà che si inmanein i concierts.
Al è previodût un trasferiment gratuit su prenotazion tal lûc dal conciert cun partence di Udin e Tumieç. Par informazions e prenotazions: www.carniarmonie.it.
L’Anciuti Music Festival al dimostre cemût che une tradizion antighe e pues deventâ, tal nestri timp, un pont di incuintri tra culturis diferentis, là che la memorie dal passât e cjate une vite gnove tal sun di un strument che, graciis a artiscj come Anciuti e Mayer, al continue a incjantâ il public. ❚
L’Anciuti Music Festival al fâs fieste pai siei dîs agns cun Albrecht Mayer, prin oboe dai Berliner Philharmoniker
Alessio Screm
