Sfuei Mensîl Furlan Indipendent
Archivi de Patrie

VIERZIDURE – La tutele e i siei timps

............

“Passâts dîs agns de emanazion dal regolament de leç 482 dal 1999, la tutele de minorance linguistiche furlane dentri de scuele e je inmò une vore lontane di jessi sigurade pardabon”: lis peraulis di Odorico Serena, di simpri espert di ponte de Filologjiche in materie di scuele, a pandin il marum di tancj che a cjalin cun voi critics ae aprovazion dal gnûf regolament su la scuele che nol rispuint aes domandis ni dai operatôrs dal setôr ni des tantis fameis che a àn sielzût tai agns passâts l’insegnament de marilenghe. “I ritarts tal adempiment des normis, i bêçs metûts fûr dal Guvier che a van simpri al mancul, la mancjance di oms, lis interuzions fuarçadis in spiete che la Cort Costituzionâl e disès la sô – al elenche Serena – a àn puartât a une situazion dulà che no si sa ni se e cemût che dutis lis scuelis des zonis tuteladis a àn osservât lis disposizions in materie ni se i uficis regjonâi a vedin tignût di voli la situazion”. Un cuadri che al lasse scaturîts. Cu la aprovazion dal gnûf regolament, “al somee che la situazion e puedi gambiâ: prontis lis regulis par insegnâ la lenghe furlane a scuele, si promet; e prontis la liste regjonâl dai insegnants di meti in cjamp insieme cu lis liniis vuide par meti adun daurman un plan operatîf. Ancje se si spere che al sedi vêr, al ven dut câs di domandâsi se lis scuelis interessadis a àn pardabon metût ogni an a disposizion dutis lis risorsis pussibilis pal furlan o se, sprolungje che ti sprolungje i timps, la marilenghe e finirà par discomparî”.
CRITICS ANCJE I COMITÂTS_ Nol è difarent il judizi dal comitât 482, che al note cun displasè cemût che “ancje il prossim an scolastic si inviarà cence che si puedi meti in vore ce che al previôt il regolament”. Pai siei membris “al sarès plui che a vonde par jessi rabiâts, ma di problemis a ‘nd è ancje altris intal regolament imbastît de Zonte”. Intant i timps, che si strissinin al infinît: po i finanziaments, insuficients ancjemò prin di imbastî ce che la leç e previôt. “Manifestazion di incapacitât o di mancjance di volontât politiche di dâ atuazion ae leç regjonâl 29/07 e di garantî il dirit di imparâ a scuele la marilenghe pes fameis che lu vuelin”.
Il Comitât pe autonomie, par bocje di Vigji dal Piçul, al ponte il dêt sul fat che “dome in pocjis scuelis il furlan al è insegnât di mestris cuntune preparazion specifiche. Fin cumò a saran un centenâr e a ‘nt coventaressin ancjemò almancul 300, stant che il 60 par cent des fameis furlanis al domande che ai fîs ur vegni insegnade la marilenghe”. Si scuen duncje sburtâ “par ricognossi chestis professionalitâts e coordenâ la azion di formazion di chescj docents di bande de Universitât”. Se il Comitât al valute in maniere positive il fat che il Regolament regjonâl al permet di sielzi l’insegnament dal furlan une volte sole al inizi des maternis, des elementârs e des mediis, une critiche sclete e ven ai timps biblics che a coventin par meti in vore chestis normis di salvaguardie pe int furlane. Par scurtâju al coventarès – par cont dal Comitât – zontâ ae aprovazion dal regolament chê dal plan aplicatîf che al permetarès di meti daurman in vore l’insegnament dal furlan. Ma dome un vuarp cumò nol viôt che ce che al mancje al è il snait che dome une fuarte volontât politiche e po dâ.
A COVENTIN INSEGNANTS CUALIFICÂTS_ E alore Vigji dal Piçul, che vuarp nol è, nol po no viodi che “la deleghe in blanc al Ufici scolastic regjonâl no rispuint ae fuarte bisugne di une serie formazion dal personâl”. Di fat l’U.S.R. nol è che fin cumò a vedi fat masse par prontâ criteris resonâts e rigjits di selezion dai titui. Il risi al è che int cun titui pôc valits e rivi a cjapâ il puest di insegnants cualificâts ma che a an mancul volum di cjartis di presentâ. “La uniche soluzion vere e je previodi di istituî la figure specifiche dal insegnant di lenghe furlane”. La plui ingredeade des problematichis e reste dut câs chê dai finanziaments, “500 mil euros che no son avonde par garantî la presince tes scuelis di un just numar di docents. La ocasion par fâ cressi cheste cifre a jerin lis variazions di belanç di 186 milions di euros. Ma ancje li nancje un franc al è stat impleiât pe marilenghe, ancje se il conseîr Pd Paolo Menis al veve presentât un emendament di pueste par sburtâ il ricognossiment dal Master par insegnants di lenghe furlane: l’apel al è colât tal vueit vie pal ultin consei regjonâl prime des feriis. Ma come che e dîs Silvana Schiavi Fachin, “cuant che si fevele di furlan nessun nol vierç il tacuin”.
Walter Tomada

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +