VIERZIDURE – Fieste de Patrie a Manià

Daspò doi agns (Cordovât 2009) lis celebrazions pe Fieste de Patrie a tornin in provincie di Pordenon, a Manià. Chest moment fondamentâl pe int e pe culture furlane al cuiste un significât particolâr intun moment li che i media talians a tratin “la lenghe furlane” come un cualsisedi dialet e li che lis identitâts no gjoldin propit di tante fortune e stime di bande des istituzions. La fieste de Patrie e je un event che nus jude, visantsi prin di dut di dulà che e rive la nestre storie, a capî li che o volin lâ e soredut cuâl che al è il stât de salût dal furlan.
Par cheste edizion de fieste, la aministrazion comunâl di Manià, che za dal 2008 a celebre la ricorence de date cun iniziativis e moments di agregazion, cul jutori dal Istitût Ladin Furlan Pre Checo Placerean, e à inmaneât une schirie di apontaments:
• Vinars ai 1 di Avrîl, scree de mostre itinerant (par cure de Province di Udin): La Patrie dal Friûl 1077 – 1797 storie art lenghe e tradizion. Ai zovins dal 1993 e vegnarà consegnade une copie de costituzion voltade par furlan.
• Sabide ai 2 di Avrîl, incuintri (par cure dal Centri Interdipartimentâl di Ricercje su la Culture e la Lenghe dal Friûl) sul teme: Documents tart-medievâls e studis lessicgrafics sul furlan. Li dal museu Coricama si davualzerâ un incuintri di presentazion dal vulum  publicât in ocasion des celebrazions dai 634 agns de Patrie, Descrittione della Patria del Friuli (1568) di Jacopo Valvason Maniago.
A intervignaran:
Angelo Floramo (curadôr dal volum): Cuntignûts e vicendis dal manuscrit di un ricercjadôr incuiêt.
Laura Guaianuzzi (ricercjadore): Notis sul cjistiel di Manià.
Aldo Colonnello (dal Circul Culturâl Menocchio): Dulâ erie situâde la antiche Caelina?
• Domenie ai 3 di Avrîl, Sante Messe e cerimonie in marilenghe.
Ceremonie (li de sale consiliâr dal Cumun) di presentazion dal Prin concors di poesie furlane dedicât al poete maniaghês Antonio Rosa Brustolo e gustâ finâl.
Sandri Olivetto