Sfuei Mensîl Furlan Indipendent
Archivi de Patrie

VIERTIDURE – Tra lis tendis cui predis

............

Il 1976 e je une date di segnâ in ros sul calendari da storie dal Friûl: l’Orcolat al fasè sintî dut il so pês in buine part di cheste tiere. Une sdrumade no dome di muarts e di cjasis, ma ancje sociâl e culturâl, dopo dai 6 di Mai, in Friûl nuie al è stât come prime.
Tancj i protagoniscj di chel toc di storie, tancj i episodis che a saressin di contâ par fâ memorie e soredut, la storie da nestre int. Plui che lis fuarcis dai partîts in chel Friûl dal ’76, i motôrs si cjatarin te volontât de int a restâ tai lôr lûcs e tai riferiments secolârs che i paîs a vevin: i predis. Bastarès citâ cualchi non par rindisi cont: pre Checo Placerean (Montenârs), pre Pauli Varut e Gjulio Ziralt (Vasinis e Bordan), pre Antoni Beline (Val e Rualp) e insom pre Duilio Corgnali e Agnul Zanel (Dartigne). E propit bonsignôr Corgnali nus dâ la ocasion par tornâ a rindi presint chel timp.
Indulà jerial in chê gnot dai 6 di Mai dal 1976?
O jeri a Rome, o insegnavi tun liceu e chê sere no ai vût scrupul che al fos sucedût alc di grâf. La matine dopo, i miei students, mi àn fât capî che no jere cussì lizere come che lis primis notiziis a fasevin palesâ. O ai cjapât il prin avion e o soi partît.
Ce impression aial vût la matine dopo? Cuâl jerial il morâl de int?
Jo o soi lât de mê int a Manzaniel e li a stavin ducj ben, ma la pôre e jere grande. Dut al trimave, ma i dams par fortune no jerin grancj. La int e zirave come se no rivàs a tirâsi in ca. Ma il piês al jere intune altre bande dal Friûl, alore cu gno fradi si sin cjapâts e o sin partîts a viodi. O sin lâts a cjatâ pre Agnul Zanel e Gjelindo Lavaron a Dartigne. Rivâts in place o vin cjatât il paîs sdrumât e pre Agnul svolmenât, tant che o sin tornâts a cjase cu la idee di tornâ tun secont moment. O varès vût di tornâ a Rome, ma par un curiôs câs di une telefonde falade, o soi finît a dâ une man a pre Zanel.
I predis dai paîs si sono mots in autonomie cu la int, o jeriso coordenâts de curie?
I predis si movevin in autonomie. Di simpri a àn vivût cu la lôr int e il taramot nol podeve jessi alc che al vignive gjestît di fûr, ma di dentri. Nô o jerin un dai riferiments. Dopo la organizazion materiâl e vignive la riorganizazion sociâl. La int e veve di cjatâ, e di corse, i siei ponts di riferiment, scomeçant dai cjamps des tendis dongje des lôr cjasis.
Cuâl isal stât il pês di Glesie Furlane?
Glesie Furlane si mostrave plui che come grop, come personis ativis e presintis cu la lôr int.
O pensi a pre Checo a Montenârs o pre Varut che al jere tal diretîf dal coordinament des tendopolis.
Ce si visiâl da la letare di Glesie Furlane (Ai furlans ch’a crodin n.d.r) e da la vignude di Andreotti tal Istât dal 1976?
Tal prin câs al è stât un document che al à vût un eco nazionâl grazie ai gjornâi e lis conseguencis lis cognossìn. Tal câs di Andreotti, o pues dî di plui, jessint stât te organizazion. O volevin fevelâ diretementri cun lui, faî presint ce che o volevin e i disasis che o vivevin. I sorestants no volevin ricognossi une autoritât che e fos difarente di chê istituzionâl. La int che e fevelave, e decideve, e puartave indenant la sô idee, no jere masse considerade. Ancje il Messaggero Veneto, no si mostrave coret. Al ignorave ogni rivendicazion de int, nol diseve peraule dal lôr legjitim malcontent. Cussì o vin organizât une serie di presidis su la strade che o savevin che al varès fât Andreotti. Ogni strade che al cjapave, al cjatave la int che i domandave di fevelâi. Fin che lu vin incjantonât te caserme di Glemone. Li no nus lassavin jentrâ. Al è stât un grant moment, cuant che, rivât il vescul Battisti, ancje lui al à dit che se no jentrave une rapresentance de int, lui al restave cun  lôr fûr dai cancei, come che dopo e je stade. Po dopo Andeotti al è fuît par daûr, ma a Bordan al à cjatât pre Varut che lu spietave e che i à fat sintî lis nestris resons.
Tal libri di Londar sul taramot, si tabaie di tensions tra la popolazion e la organizazion imponude. Cemût reagjivie la int?
A son situazions che no son stadis compagnis in ogni lûc. La storie di Glemone no je chê di Dartigne. Dut câs nô o vin vût un pâr di scuintris cui militârs, par vie che a volevin organizâ lis tendopolis cuntun criteri “eficientist”, lôr lu clamavin il “campo romano”. Une maniere di fâ lontane des esigjencis de int. Cuant che a son rivâts cuntun tic di arogance, a son stâts lôr a vê bisugne de int. Nô o jerin za ben che organizâts.
Ce isal restât di chê esperience di là de retoriche?
Forsit e je une esperience che no je stade digjeride, no sai ce che al è passât a lis gjenerazions dopo dal ’76. Pre Varut al diseve une robe juste: tai 10 agns tra il 1976 e il 1986 o vin vivût cuntune acelarezion svolmenade. Il Friûl al è cambiât masse di corse e chel, forsit, nol à dât il timp che al covente par sedimentâ e passâ cheste esperience. ■
Mauro Della Schiava

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +