Conference sul stât di aplicazion de leçs di tutele de lenghe furlane: si pant la mancjance di une linie politiche pe lenghe furlane
Sabide ai 24 di Novembar e je stade la prime conference regjonâl previodude, almancul une volte ogni 5 agns, de leç 29/2007. Za altris a àn notât pecjis te organizazion e la mancjance di partecipazion, ma di là di chescj fats obietîfs, une analisi plui profonde che e cjali i contignûts de conference e oblee a fâ riflessions su ce che e je stade tai ultins agns e su ce che e je cumò la politiche linguistiche pal furlan.
La situazion cemût che e ven fûr de conference e fâs pardabon preocupâ: di une bande si è pandude une buine capacitât di analisi tecniche de situazion, cun intervents ben documentâts e organizâts di Erica Adami (media), Federica Angeli (aministrazion publiche), Patrizia Pavatti (scuele); di chê altre bande però e je risultade, di bande dai sogjets “politics”, la incapacitât o la impussibilitât di dâ une leture che e proponi soluzions pai problemis vignûts fûr a nivel tecnic.
Si pues pardabon fevelâ di incapacitât par vie che un grant numar dai intervents “politics” a son lâts fûr di teme: cualchidun al à tocjât cierts argoments leâts in maniere gjeneriche ae lenghe furlane, tancj a àn ribatût la impuartance de lenghe furlane par difindi la autonomie regjonâl, altris a son rivâts a slontanâsi in misure paradossâl dai fins de conference, pandint une ignorance che e alce di pês. In ogni câs nissun responsabil politic nol è lât a frontâ il grop de cuistion: in relazion ai obietîfs de LR 29/2007 ce isal stât fat? ce no isal stât fat? parcè? ce si aial di fâ?
Za timp prime de conference, il Comitât 482 al veve fat une liste di ponts critics e la matine stesse chê scjalute dai inadempiments e je stade dade a ducj chei che a jentravin te sale. Pai politics al è stât come se chei ponts no fossin. Par esempli diviers regolaments che pe leç a vevin di jessi fats tal tiermin di 6 mês de jentrade in vore, e che a coventin par fâ funzionâ la leç stesse, dopo cinc agns no son ancjemò: i assessôrs no àn calcolât che si ves di dâ une rispueste o une justificazion.
I rapresentants politics a àn dedicât invezit avonde timp a insegnâ ae piçule platee trop impuartante che e je, in teorie, la lenghe furlane; a àn sglonfât chês pocjis iniziativis che a àn rivât a fâ; a àn dite dai bêçs che a son simpri di mancul, prometint, cence podê garantî nuie, che a ciraran di recuperâ cualchi franc rispiet ai tais che si previodin a ducj i nivei.
In struc cheste conference e je un faliment, ma un faliment che al à cualchi utilitât: nus mostre fûr di ogni dubi che lis capacitâts tecnichis di analizâ lis problematichis de planificazion linguistiche pe lenghe furlane a son, dome che a vegnin ignoradis di plante fûr de plui part dai aministradôrs e de classe politiche. Une distance spropositade tra “savê” e “podê/volê”: cheste e je la clâf di leture che nus fâs capî la mancjance complete di politiche linguistiche pe lenghe furlane tai ultins 5 agns. ■
Comitât 482