VIERTIDURE – Frico o bandiere?

Cu la riconcuiste de zone Champions League (pal moment dome i preliminârs, eh!) di bande dal Udin, al torne il moment par une riflession sul valôr identificatari che la scuadre Blancje&Nere e à pal Friûl.
“Ce frico cul chel Zico” al titulave pre Antoni tun editoriâl che o vin ripuartât a pagjine 13. “L’Udin no si discut” al rispuint Giacomini a distance di 30 agns te interviste che e vierç cheste Patrie.
A cui dai reson? Cence volê jessi masse “democristians” si scuen rispuindi “A ducj i doi!”.
Parcè che e je vere che, ancje in gracie dai sucès dai ultins agns come cu la vignude di Zico, l’Udin al è deventât une bandiere, un simbul di rivincite pai sportîfs furlans, puartant ancje la citât e il Friûl sot dai rifletôrs internazionâi.
Ma bastial? Chi o rispuindìn di no. Altris esemplis tant che Barcelone, dulà che la societât e fâs imparâ il catalan a ducj i zuiadôrs, o l’Atletico Bilbao che al tesserave dome bascs a dimostrin ce che al significhe jessi riferiment di une identitât, no dome di sport.
L’Udin al à di vê plui coragjo, rinfuarçant chê buine strade cjapade cu la convenzion Arlef, ma cence spietâ che la iniziative e vegni dal ent public.
Ducj a puartin la nestre Societât come esempli di buine gjestion sul plan tecnic e finanziari. Il Friûl si spiete che cheste fuarce e torni al teritori dut l’afiet che i furlans a àn dimostrât tai siei confronts: cui risultâts in cjamp, ma ancje cuntun politiche a pro de identitât furlane. ■
Redazion